Qoǵam tynyshtyǵynyń saqshysy – polısııa qyzmetkerleri. Olar kúndiz de, túnde de ýaqytpen sanasýdy bilmeıdi. Jyldyń tórt mezgilinde de turǵyndardyń qaýipsizdigin qorǵaý úshin qaterge basyn tigedi. Oblystyq polısııa departamentiniń bastyǵy Qamza Úmbetqalıevtiń málimetinshe, modýldik tıptegi stasıonarlyq beketter qalanyń adamdar kóp shoǵyrlanatyn bóliginde ashyldy.
Qazir polıseıler osyndaı alty bekette táýlik boıy kezekshilik atqarady. Jyl basynan beri modýldi stasıonarlyq beketterdiń kezekshi qyzmetkerlerine túrli másele boıynsha 500-den astam azamat júginipti. Mundaı beketter qoǵamdyq oryndarda bolatyn quqyqbuzýshylyqtar sanynyń eki esege tómendeýine, jalpy qylmystyq áreketterdiń ashylýyna oń áserin tıgizipti.
– Oblys ákimdiginiń qoldaýymen bıyl josparlanǵan 34 ýchaskelik polısııa pýnktteriniń 28-i iske qosyldy. Quqyqbuzýshylyqpen kúreske jedel den qoıý, turǵyndar qaýipsizdigin qorǵaıtyn ýchaskelik ınspektor qyzmetiniń qoljetimdiligin arttyrý úshin salynǵan ýchaskelik polısııa beketteriniń 22-si turǵyn úımen biriktirildi. Qazir oblys aýmaǵynda 92 ýchaskelik polısııa beketi qyzmet atqarady. Atyraý qalasyndaǵy 27 ýchaskelik polısııa beketinde 90-nan astam ýchaskelik polısııa ınspektory men 30-dan asa olardyń kómekshisi qyzmet atqarady. Buǵan qosymsha taǵy da ýchaskelik polısııa beketterin ashý qarastyrylýda, – deıdi Qamza Úmbetqalıev.
Onyń aıtýynsha, óńirde 232 ýchaskelik polısııa ınspektory jumys isteıdi. Inspektorlardyń jumysynyń tıimdiligin arttyrýǵa septesetin 71 kómekshisi bar. Olardyń bári portatıvti beınetirkegish, radıostansa, planshet sekildi zamanaýı tehnıkalarmen qamtamasyz etilip otyr. Jaqynda Ishki ister mınıstri Erlan Turǵymbaevtyń tapsyrmasymen ýchaskelik polısııa ınspektorlaryna avtokólikter bólindi. Sondaı qyzmettik kóliktiń biri Atyraý qalasyndaǵy №14 ýchaskelik polısııa beketine berildi. О́ńirdegi úzdik ýchaskelik polısııa beketine «Nıva» kóligin oblystyq polısııa departamentiniń bastyǵy, polısııa polkovnıgi Qamza Úmbetqalıev tabys etti.
– Memleket basshysynyń Joldaýyndaǵy tapsyrmalardy iske asyrý maqsatynda ýchaskelik polısııa qyzmetkerleriniń mártebesin kóterý, olardyń ókilettigin keńeıtip, materıaldyq-tehnıkalyq jaǵdaıyn jaqsartý qolǵa alyndy. Qazir halyqpen udaıy baılanysta bolatyn ýchaskelik ınspektorlar jumysynyń tıimdiligin arttyrýda materıaldyq-tehnıkalyq bazany nyǵaıtý júrgizilýde. Memleket tarapynan azamattardyń qaýipsizdigin qamtamasyz etip, jedel áreket etý úshin polısııa qyzmetkerlerine barynsha qoldaý kórsetilýde, – deıdi departament bastyǵy Qamza Úmbetqalıev.
Atyraý qalasyndaǵy №14 ýchaskelik polısııa beketiniń ınspektorlary 48 myńǵa jýyq turǵyny bar «Nursaıa», «Bolashaq», «Jeti qazyna», «Tulpar», «Jeruıyq» birneshe shaǵyn aýdandaǵy qoǵamdyq tártipti qadaǵalaıdy. Munda jańadan salynǵan kópqabatty jáne jeke turǵyn úıler, sporttyq keshen, kásiptik bilim beretin joǵary kolledj, Nazarbaev zııatkerlik mektebi, úsh orta mektep, aýrýhana, birneshe kóńil kóterý orny sekildi nysandar bar. Bul ýchaskelik polısııa beketi de planshettermen, beınetirkegish, baılanys quraldarymen qatar, ákimshilik aýmaqtaǵy aýlalar men basqa da qoǵamdyq oryndar beınebaqylaý kameralarymen jabdyqtalǵan.
– Men 2014 jyldan beri ýchaskelik polısııa qyzmetkeri bolyp jumys isteımin. Ǵımaratymyz 2018 jyly paıdalanýǵa berildi. Endi mine, jańa kólikke ıe boldyq. Bul bizdiń shaqyrtýlarǵa jedel jetip, qoǵamdyq tártipti buzýshylardy «quryqtaýǵa» yqpal etedi, – deıdi aǵa ýchaskelik polısııa ınspektory, polısııa kapıtany Rústem Jumabaev.
Atyraý oblysy