Qarashanyń 20 men 21 kúnderi "Astana Balet" teatrynda klassıkalyq balet óneriniń keshi ótedi, dep habarlaıdy Egemen.kz.
Astanalyq ujym úsh týyndyny tartý etpekshi: horeograf Aınur Ábilǵazınanyń "Trıýmf" klassıkalyq dıvertısmentinińpremerasy, Djordj Balanchınniń "Serenada" bir aktili baleti men Rıkardo Amaranteniń "Diversity" baletinen úzindi.
О́nersúıer qaýym dırıjer Arman Orazǵalıevtiń jetekshiligindegi sımfonııalyq orkestrdiń oryndaýynda Petr Chaıkovskıı, Antonıo Vıvaldı, Lıýdvıg Mınkýs, Aleksandr Glazýnov, Sergeı Rahmanınov, Sharl Gýno men Kamıl Sen-Sanstyń shyǵarmalaryn tyńdaı alady.
"Meniń oıymsha, jas daryndy horeograftarǵa sahnasyn usyna otyryp, teatr óziniń shyǵarmashylyq qýatyn aıǵaqtap otyr. Aınur Ábilǵazınanyń "Trıýmf" dıvertısmenti Chaıkovskııdiń mýzykasyna qoıylǵan: orkestrge arnalǵan №3 sıýıta. Bul týyndy alǵashqy ekeýimen salystyrǵanda edáýir aýqymdy, qarymy keń. Aınur Ábilǵazına sıýıtanyń taqyryp pen varıasııalar formasynda jazylǵan sońǵy bólimin alǵan. Munda skrıpka solosy keńinen qoldanylady, osylaısha solıstterdiń dybystyq jáne tehnıkalyq múmkinditerin tanýǵa bolady. Bizdiń orkestrde bul solony ǵalamat skrıpkashy Qalamqas Jumabaeva oryndap shyǵady", deıdi maestro Arman Orazǵalıev.
"Astana Balet" teatrynyń jetekshi solısti Aınur Ábilǵazına buǵan deıin jeke bılerdi qoıǵan bolatyn. Al, "Trıýf" onyń alǵashqy kólemdi jumysy. Oǵan jıyrma shaqty ártis qatysady. Klassıkalyq bı negizderine súıengen horeograf ásem, názik ári bıik óner úlgisin ushtastyrǵan dıvertısment jasap shyǵardy.
"Bul týyndy – klassıkalyq ónerge degen taǵzym. Sebebi, klassıkalyq balet barlyq baǵyttar men stılderdiń bastaý bulaǵy ǵoı. Orys balet mektebiniń negizin bilgendikten, men, kishkentaıymyzdan boıymyzǵa sińirip ósken ónermen, qazirgi ǵajaıyp jaı-kúıimizben bóliskim keldi. Maǵan senim artyp, horeograf retinde ózimdi tanytýǵa múmkindik bergen teatr basshylyǵyna alǵysym sheksiz. Sózsiz, ártisterge de iltıpatym erekshe. Olar qurmetin tanytyp, maǵan qoldaý bildirdi. Qazir men bárin ekshep jatyrmyn. Artyq ketken tustary bolsa alyp tastap, jetispeı jatqan bolsa keıbir elementterdi qosyp jatyrmyn. Meniń basty maqsatym osy bıdi tıisti deıgeıde kórsetip shyǵý. Al, emosııalar keıinge qalyp otyr", deıdi horeograf Aınur Ábilǵazına.
Premeraǵa daıyndyq qarqyn alyp keledi: repetısııa zalynda ártister jańa horeografııany úırenip, kostıýmerler repertýardaǵy spektaklderdiń kostıýmderin daıyndap, tigin sehy bolsa, balettiń eń jarqyn belgileriniń biri – klassıkalyq pachkany daıyndap jatyr.
Tigin sehynyń ismerleriniń aıtýynsha, on qabattan turatyn bir balet pachkasyn daıyndaýǵa 14 - 16 metr arnaıy mata – qatty shilter jumsalýy múmkin. Er adamdar bolsa, klassıkalyq balet kanondaryna sáıkes trıko men kolet kıip shyǵady.
Klassıkalyq balet óneriniń keshi QR Mádenıet jáne sport mınıstrliginiń qoldaýymen júzege asyrylady. Bastalýy 20-qarasha, saǵat 19:30, 21-qarasha, saǵat 18:00.