Reseı Federasııasynyń 5 oblysymen shektesetin, Eýroodaq elderine eń jaqyn ornalasqan Batys Qazaqstan oblysynyń tranzıttik áleýeti joǵary.
Osy oraıda, óńirdiń kóliktik-logıstıkalyq áleýetin damytý – Memleket basshysynyń oblys ákimine bergen basty tapsyrmasynyń biri. Bul baǵytta ótken jyly Batys Qazaqstan oblysy boıynsha 368 shaqyrym jol jóndelse, bıyl 436,5 shaqyrym joldy qalpyna keltirýge 36,2 mlrd teńge qarajat qarastyrylǵan.
Reseıdiń eń iri ortalyqtarynyń biri – Samara qalasymen baılanystyratyn «Samara-Shymkent» avtojolyna, Saratov oblysyna shyǵatyn «Chapaev-Jalpaqtal-Qaztalov-Reseı Federasııasy shekarasy» joldaryna jóndeý jumystary júrgizilýde.
Sondaı-aq Batys Qazaqstan oblysyn Reseıdiń Volgograd, Astrahan oblystarymen baılanystyratyn respýblıkalyq mańyzy bar «Qaztalov-Jánibek-RF shekarasy», «О́nege-Bısen-Saıqyn» avtojoldaryn salý jumystary da jalǵasýda.
«Reseıdiń Orynbor oblysy baǵytyndaǵy «Podstepnoe-Fedorovka-Reseı Federasııasy shekarasy» jolyn jóndeý úshin jobalyq-smetalyq qujattama daıyndaldy» deıdi óńir basshysy Ǵalı Esqalıev.
Jaıyq ózenin jaılaǵan qos oblys turǵyndary Atyraý-Oral tasjolynyń jaǵdaıy týraly sońǵy ýaqytta jıi másele kóterip júr. О́ıtkeni eki jolaqty jol qozǵalysy jeńil jáne júk kólikteriniń dittegen jerine tez ári aman-esen jetýine tarlyq etedi. Sol sebepti atalǵan baǵyttaǵy joldyń enin keńeıtý týraly usynys kópten aıtylatyn. Mine, jaqynda atalǵan tas joldy rekonstrýksııadan ótkizýge, ıaǵnı jol jıegin uzartý úshin jobalyq-smetalyq qujattama jasaýǵa qarajat bólingen.
Osy aıtylǵan jumystar oblystyń tranzıttik áleýetin damytyp, óńir ekonomıkasynyń kiris kózderin arttyratyn bolady.
Batys Qazaqstan oblysy