Qazirgi tańda probasııa esebindegi azamattardyń basym kópshiligi jeke kásipke bet burǵan, dep habarlaıdy Egemen.kz
Bul probasııa ınspektorlary men jergilikti atqarýshy organdar ókilderiniń birlesip atqarǵan jumystarynyń nátıjesi. Jýyrda Qarmaqshy aýdandyq probasııa esebinde turatyn josalylyq jigit jasandy tas shyǵaratyn kásip ashty. Al jubaıy mal sharýashylyǵymen aınalysyp, otbasylyq kásipti damytyp otyr.
Sottalǵan azamat bıyl "Nátıjeli jumyspen qamtý jáne jappaı kásipkerlikti damytýdyń 2017 – 2021 jyldarǵa arnalǵan baǵdarlamasy" boıynsha "Bastaý Bıznes" jobasy aıasynda oqý kýrsyn aıaqtaǵan bolatyn. Kýrsty aıaqtaǵan soń bıznes josparyn quryp, komıssııaǵa usyndy. Komıssııanyń oń sheshimin alǵannan keıin oǵan memleket tarapynan qaıtarymsyz grant negizinde 555 666 teńge kóleminde sertıfakat tabystaldy. Osy qarjyǵa jasandy tas shyǵarýǵa qajetti zattardy alyp, kásibin bastap ta ketti.
– Birde áleýmettik jelilerdi sholyp otyrǵanymda osy kásip jaıly bildim. Bul meni birden qyzyqtyrdy. Memleket tarapynan berilgen qaıtarymsyz grantqa qajetti zattardy aldym. Jasandy tas gıpsten jasalady, gıpsty qataıtý úshin plastıfıkator qoldanylady. Tasty ár túske boıaýǵa bolady. Bul ónimge suranys óte kóp. Aýdandaǵy jasandy tas shyǵaratyn jalǵyz kásipker men bolǵandyqtan, jýyrda oblysta ótetin kórmege qatysqaly otyrmyn, – dedi eseptegi azamat.
Jyl basynan probasııa esebindegi 4 sottalǵan "Bastaý Bıznes" jobasy aıasynda kásipkerlik negizinde oqý kýrsyn aıaqtap, ekeýi mal sharýashylyǵyn, taǵy ekeýi taýyq ósirý jáne jasandy tas jasaý jeke kásibin ashty.
– Eseptegi azamattarǵa áleýmettik-quqyqtyq kómek túrlerin kórsetý barysynda otbasylyq jaǵdaıyn da zerdeleımiz. Turmys jaǵdaıy tómen otbasylarǵa tıisti áleýmettik kómek kórsetiledi, – deıdi aýdandyq probasııa qyzmetiniń aǵa ınspektory, ádilet maıory J.Júnisov