Alǵa aýdany Saryqobda aýyldyq okrýgine qarasty Bolgarka eldi mekenine gaz qubyry júrgizilip, 500 turǵyny bar aýyl kómir jaǵý men kúl shyǵarýdyń azabynan qutyldy. Bolgarkaǵa kórshiles jatqan Saryqobda eldi mekeniniń turǵyndary da biraz kúnde kógildir otynnyń qyzýyn sezinetin bolady.
«Aqtóbe – Shubarqudyq» tas jolynyń boıynda ornalasqan Bolgarka aýylynyń turǵyndary mal baǵyp, baý-baqsha, bıdaı, arpa egýmen aınalysyp keledi. Birer jyl buryn aýylǵa ortalyqtandyrylǵan aýyz sý júrgizildi, Internet baılanysy da jaqsy. Bir kemshiligi – turǵyndar sanynyń azdyǵy. О́mir súrýge qolaıly múmkindik týsa, Bolgarka men Saryqobda eldi mekenderine kóship kelýshiler qatary kóbeıe túsedi degen pikirde aýyl aqsaqaldary. Degenmen, jyl saıyn 4-5 otbasy Bolgarkaǵa kóship kelip, úı salyp, sharýashylyqpen aınalysyp jatyr.
– Keńestik kezeńde kómir jaqqan aýyldarǵa gaz qubyrlary tartylyp, jaqsy joldar salynýy – turǵyndardyń ıgiligi úshin jasalynǵan táýelsizdiktiń jemisteri. О́zderińiz baıqap otyrǵandaı, qazirgi kezde barlyq aýyldardyń ajary kirip jatyr. Alǵa aýdanynda gaz barmaǵan eki-úsh aýyl ǵana qaldy. Ras, aýyl turǵyndary talaı qıyndyqty bastan keshirdi. Naryq qysymyna shydaı almaı, kóptegen jumys oryndary jabylyp qaldy. Soǵan qaramastan, sizder aýylda turyp, sabyrlylyq tanyttyńyzdar. Shydadyńyzdar. Kúttińizder. Sizderdiń aýylda mal ustap, kásiptiń kózin taýyp otyrǵan eńbekterińizdi túsinip, úmitterińizdi aqtaý úshin qyzmet etetin bolamyz, – dedi Bolgarka turǵyndaryn kógildir otyn qýanyshymen quttyqtap kelgen oblys ákimi Ońdasyn Orazalın.
Aýyl aqsaqaly Amangeldi Tyrnaqov rızashylyǵyn bildirdi. Bolgarka aýylynyń turǵyny Marına Marınova da ot jaǵyp, kúl shyǵarýdyń beınetinen qutylǵanyna óte qýanyshty.
– 59 jyldan beri aýylda turyp kelemiz. Osy jerde ósip-órbidik. Buryn otynǵa maldyń tezegin jınap, qysta kómir jaǵatynbyz. Kómir satyp alýǵa jyl saıyn 150 myń teńge jumsaıtynbyz. Endi otynǵa degen shyǵynymyz azaıady, óıtkeni aı saıyn gaz úshin tóleıtin aqy kómirdiń qunynan arzanǵa túsedi, – deıdi ol.
Saryqobda aýylynyń turǵyndary da qubyr tartý jumystaryn aıaqtap, aýylishilik gaz jelilerin ornatyp jatqan merdigerlerdi asyqtyryp otyr. Osylaısha bıylǵy jyldyń sońynda Bolgarka men Saryqobdany qosqanda, Alǵa aýdanyndaǵy barlyq eldi mekenderdiń kógildir otynmen qamtylýy 97 paıyzǵa jetti.
Aqtóbe oblysy,
Alǵa aýdany