Kópshilikke qyzmet kórsetip, kassada otyrǵan qyz aqsha sanaýdan basqaǵa alańsyz edi. «Kezekti kelýshi kúsh kórsetip, bar aqshany alyp ketedi» degen oı múlde kelmegeni jáne anyq. Kassaǵa kelgen jigit 20 myń teńgesin usaqtap berýdi suraıdy. Kúndelikti kezdesetin jaıt, alańsyz aqshasyn usaqtap bergen. Osy sátte jas jigit kelýshilerdiń joqtyǵyn paıdalanyp, kassada otyrǵan qyzdyń 170 myń teńgesin tartyp alyp, qashyp ketken.
Túrkistan oblysy Jetisaı APB-niń kezekshi bólimine oıyn zaldarynyń biriniń operatoryn tonap ketkeni týraly habarlama kelip tústi. Oqıǵa ornyna birden polısııanyń jedel-tergeý toby shyqty. Polıseıler kassada turǵan qyzǵa mekemege kelýshi shabýyl jasap, 170 myń teńgesin kúshpen tartyp alyp, belgisiz baǵytta jasyrynǵanyn anyqtaǵan. Oblystyq Polısııa departamenti baspasóz qyzmetiniń habarlaýynsha, atalǵan oqıǵa aýdandyq polısııa bóliminiń SDTBT-ne QR QK-niń 191-baby «Tonaý» boıynsha tirkelgen. Kúdiktini izdeýge kirisken jedel ýákilder beınebaqylaý kameralaryn tekserip, jaqyn mańdaǵy kóshelerdi, qonaqúılerdi jáne basqa da barýy, múmkin jerlerdi qarap shyqty. Osylaısha 10 kúnge sozylǵan jedel-izdestirý is-sharalarynyń nátıjesinde aýdan polıseıleri kúdiktini Shymkent qalasyndaǵy jaldamaly páterlerdiń birinen ustady. Ol buryn sotty bolǵan jergilikti turǵyn bolyp shyqty. Aıǵaqty zat retinde aqsha alynyp, zańdy ıesine qaıtaryldy.
Qazirgi ýaqytta tonaý faktisi boıynsha sotqa deıingi tergeý amaldary júrgizilýde. Kúdikti qamaýǵa alynǵan. Polısııa qyzmetkerleri ustalǵan adamnyń basqa da osyndaı qylmystarǵa qatysy bar-joǵyn anyqtaýda.
Jetisaı aýdany polısııa bóliminiń qyzmetkerleri óńirdegi taǵy bir qylmysty istiń ashylýyna úles qosty. Túrkistan oblysynda turǵyndarǵa 1,5 mlrd-qa jýyq shyǵyn keltirgen «Indigo-24 Evolution» qarjy pıramıdasyn uıymdastyrǵan 12 kúdikti ustalyp, qamaýǵa alyndy. Eske sala keteıik, bıylǵy jazda jedel-izdestirý is-sharalary barysynda aýdandyq polısııa bóliminiń qyzmetkerleri Jetisaı qalasyndaǵy «Indigo-24 Evolution» qarjy pıramıdasynyń qyzmetin toqtatqan bolatyn. Bul jaıt QR QK-niń 217-baby 3-bóligi «Qarjylyq (ınvestısııalyq) pıramıdany qurý jáne oǵan basshylyq etý» boıynsha tirkeldi. Bir aı ótkennen soń jábirlenýshiler sany 300-den asty. Osydan soń polısııa qyzmetkerleri atalǵan iske qatysy bar basqa da kúdiktilerdi ustaý úshin, túr-tulǵasyn anyqtap, izderine tústi. Jetisaı APB-ǵa Shymkent qalasynan qarjylyq pıramıda uıymdastyrdy degen kúdikpen aýdan turǵyny jetkizildi. Sondaı-aq onyń eki sybaılasy, Maqtaaral aýdanynyń turǵyndary da ustaldy. Tergeý barysynda keńsege tintý júrgizilip, qujattar, jabdyqtar, kompıýterler jáne basqa da aıǵaqty zattar tárkilendi. Atqarylǵan tııanaqty jumystardyń nátıjesinde alǵashynda 5 kúdikti, keıinnen 7 kúdikti ustaldy. Olar Jetisaı, Shardara, Maqtaaral, Saryaǵash aýdandary turǵyndary kópshiliginiń aqshasyn qaıtarmaǵan.
Búginde general-maıor Qaırat Dálbekov basqaryp otyrǵan Túrkistan oblysy Polısııa departamentiniń bilikti degen tergeýshilerinen tergeý toby qurylyp, sotqa deıingi tergep-tekserý jumystary júrgizilýde. «Belgili bolǵan «Indigo-24 Evolution» qarjy pıramıdasynyń 2015 jyly Almaty qalasynda negizi qalanǵan. Onyń negizin qalaýshy men uıymdastyrýshysy retinde týys kúdiktiler ustaldy. Olardyń Túrkistan oblysynda birneshe azamatty dırektor retinde taǵaıyndap, óńir turǵyndarynan 1 mln teńgeden aqsha alyp, eselep qaıtaramyz degen qurǵaq ýádemen óz alaıaqtyq isterin júzege asyrǵan. Búgingi tańda jábirlenýshiler sany 1500-den asty. Olardyń barlyǵynyń aryzdary zańdy túrde tirkelgen. Ustalǵan 12 kúdikti de sottyń sanksııasymen qamaýǵa alyndy. Búginde belgili bolǵan shyǵyn kólemi 1 mlrd-tan astam teńgeni quraıdy. Sonymen qatar aryzdanýshylar men kúdiktiler sany artýy, soǵan sáıkes shyǵyn kólemi de ósýi múmkin», deıdi oblystyq Polısııa departamenti Tergeý basqarmasynyń bastyǵy, polısııa polkovnıgi Nurmahan Jalǵasov.
Osy oraıda Túrkistan oblysynyń polıseıleri turǵyndardy aqshany eselep beremin degen adamdardyń sózin ábden saralap, oı eleginen ótkizýge, alaıaqtardan saq bolýǵa shaqyrady. «Birinshiden, olardyń bergen aqparlaryn tolyq zerttep alyńyz. Ekinshiden, salymnyń kiristiligine muqııat mán berińiz. Neǵurlym joǵary bolsa, ol sizge kúmán týdyrýy tıis. Sebebi kez kelgen aqshańyzdy kóbeıtip beremin degen banktiń ózi birden sizdiń salymyńyzdy 50-100 paıyzǵa ósirmeıdi», deıdi polısııa qyzmetkerleri.
Túrkistan oblysy