Qaraǵandy óńirinde «Alaıǵyr» ken baıytý kombınaty salynatyn boldy. «Alaıǵyr» birlesken kásiporny» JShS atalǵan joba boıynsha tıisti kelisimshartqa qol qoıdy.
Konsorsıýmnyń quramyna qazaqstandyq úsh kompanııa kiredi. Olar – «Temir Zat» JShS, «BauProjekt» JShS jáne «MCI Group» JShS. Olar jobalyq-smetalyq qujattamany ázirlep, ken baıytý kombınatyna arnalǵan jabdyqty salýdy jáne jetkizýdi júzege asyratyn bolady.
– Ashyq tender qorytyndysy boıynsha konkýrstyq komıssııa konsorsıýmdy jeńimpaz dep tapty. Barlyq korporatıvtik is-shara aıaqtalǵan soń EPC kelisimshartyna, ıaǵnı jobalaý, satyp alý jáne qurylys aýdandaryn júzege asyrý kelisimshartyna qol qoıyldy. Merdigerler mundaı nysandarda jumys istegen. Jumys tájirıbeleri jetkilikti, – dedi «Alaıǵyr» birlesken kásiporny» JShS bas dırektory Danel Sqaqov.
Ken baıytý kombınatynyń qurylysy kezinde 253 adam jumyspen qamtylady. Al paıdalanýǵa berilgennen keıin nysanda 400-den astam jumys orny qurylady. «Alaıǵyr» ken baıytý kombınatynyń qurylysyna salynǵan ınvestısııa kólemi 128,5 mln AQSh dollaryna teń.
Qazirgi ýaqytta 143 shaqyrymdyq 110 kV joǵary voltty jeli jáne 21 shaqyrymdyq tehnologııalyq magıstral paıdalanýǵa berildi. Ken baıytý jumystaryna daıyndyq is júzinde aıaqtaldy. Infraqurylym nysandarynyń qurylysy jalǵasýda. 2022 jyldyń sońyna deıin ken baıytý kombınaty jobalyq qýatyna jetýge tıis. Iаǵnı 900 myń tonna ken óndirýi kerek.
Eske sala keteıik, «Alaıǵyr» ken orny Qarqaraly men Shet aýdandarynyń shekarasynda, Qaraǵandy qalasynan ońtústik-shyǵysqa qaraı 130 shaqyrym jerde ornalasqan. Munda polımetall ken ornyn ıgerýmen aınalysady. Ken ornynyń rastalǵan qory shamamen 1 mln tonna qorǵasynǵa teń.