Bul kúnde aýrýdyń túri kóp. Degenmen búgingideı medısınanyń damyp, dárigerlerdiń biliktiligi artqan ýaqytta kóptegen derttiń emi tabylýda. Adam ómirin saqtap qalý maqsatynda memleket tarapynan da tıisti múmkindikter jasalýda. Jýyrda Almaty qalasynda ornalasqan ortalyq klınıkalyq aýrýhana neırohırýrgııa bóliminiń meńgerýshisi, belgili neırohırýrg, elimizde ótken «100 jańa esim» jobasynyń jeńimpazy Myńjylqy Berdiqojaev Taraz qalalyq kópbeıindi aýrýhanasyna kelip, «Mı tamyrlarynyń anevrızmasy men arterıovenozdy malformasııasyn emdeý» taqyrybynda sheberlik sabaǵyn ótkizdi.
Jıynda atalǵan qaýipti dertti emdeýdiń ádis-tásilderi talqylandy. Bul shara Taraz qalasynda alǵash ret ótkizilip otyr. Myńjylqy Berdiqojaev aýrýhananyń rentgenendovaskýlıarly hırýrgi Qanat Qýandyquly men neırohırýrg dáriger Almas Kuralbaevpen birigip, arnaıy angıografııalyq kabınette Taraz qalasynyń 24 jastaǵy turǵynyna ota jasady.
Ota jasalǵan jigit qalalyq kópbeıindi aýrýhanasyna serebrovoskýlıarlyq aýrý túrimen aýyr dárejedegi qaıtalanǵan gemorragııalyq ınsýlt, oń jaq mańdaıdaǵy jedel mıishilik gematoma, arterıovenozdyq malformasııa dıagnozymen aýyr halde túsipti. Buryn mundaı naýqasqa shaldyqqandar ota jasatý úshin elimizdegi arnaıy klınıkalyq ortalyqtarǵa nemese shet memleketterge barýǵa májbúr bolatyn. Endi mundaı naýqas túrin Taraz qalasynda da emdeýge múmkindik týyp otyr. Alǵash ret uıymdastyrylǵan sheberlik sabaǵynda Jambyl oblysynyń dárigerlerine otanyń ádis-tásilderi, odan keıingi kútim, em-shara joldary týraly aıtylyp, tájirıbelik ota kórsetildi.
«Mundaı aýrýmen aýyratyn naýqastardyń 17-40 paıyzy ustama bolyp, esinen tanyp, qulap qalý jaǵdaıyna kóp ushyraıdy. Aıaq-qoldary jansyzdanady. Epılepsııalyq ustamalar sezimtaldyqtyń buzylýy, júrektiń soǵýy, bet álpeti arqyly da kórinýi yqtımal. Sátti ótken otadan naýqas aıyǵyp ketýi ábden múmkin», deıdi M.Berdiqojaev.
Taraz qalalyq kópbeıindi aýrýhanasynyń bas dárigeri Nurlan Ábildaevtyń aıtýynsha, arterıovenozdyq malformasııa – mıda nemese julynda retsiz túrde, aıqasa ornalasqan tamyrlardyń shýmaǵy tárizdi týa bitken tamyrly patologııa. Bul tamyrlardyń qabyrǵasy qalypty jaǵdaıdaǵy tamyrlarǵa qaraǵanda óte juqa bolǵandyqtan, olardyń jarylyp ketýi múmkin eken. Sonymen qatar mı men julynnyń arterıovenozdyq malformasııasy sırek kezdesetin nozologııalyq aqaý bolyp tabylady. Alaıda der kezinde munyń aldyn almasa, dárigerler kúrdeli nevrologııalyq buzylystar men ólim jaǵdaıyna alyp kelýi múmkin ekenin eskertedi. Onyń eń jıi kezdesetin jáne qaýipti klınıkalyq kórinisteri – bas aýrýy, ustamalar, qan ketý. Al ýaqyt ótkizip alǵan naýqastardyń 50 paıyzy múgedektikke shaldyǵýy yqtımal. Degenmen bilikti dárigerler jumysynyń nátıjesinde mundaı naýqas túrine Taraz qalasynda alǵash ret jasalǵan ota sátti ótti. Endi aldaǵy ýaqytta da mundaı aýrýmen aýyrǵan azamattardyń Taraz qalalyq kópbeıindi aýrýhanasynda emdelýge múmkindigi bar. Ol úshin barlyq múmkindikter qarastyrylǵan.
Jambyl oblysy