Búgin Qyzylorda qalalyq jumyspen qamtý, áleýmettik baǵdarlamalar jáne AHAT bólimi men "Baqytty otbasy" ortalyǵy "Syr analar" Alıansy keńesi bazasynda "Men baqytty anamyn" atty shara ótkizdi.
«Baqytty otbasy» otbasy ınstıtýtyn qoldaý ortalyǵynyń janynan qurylǵan «Syr Analar» Alıansy keńesi 32 erikti anadan quralǵan. Erikti analar qala aýmaǵyndaǵy 18 shaǵyn aýdanǵa bólinip, óz aımaqtary boıynsha turmys jaǵdaıy tómen, kóp balaly, az qamtylǵan jáne otbasynda múgedektigi bar azamattardy anyqtap, olarǵa kómek qolyn sozýmen aınalysady. Belsendi analar qoǵamdaǵy qoldaýdy qajet etetin jandardyń máselesine beı-jaı qaramaı demeýshiler qoldaýymen áleýmettik-gýmanıtarlyq kómekter usynyp, bilim, medısına, jáne turmystyq jaǵdaıǵa baılanysty máselelerin sheshýge atsalysyp keledi.
Búgingi kezdesý barysynda belsendi analar ózderiniń jyl kóleminde muqtaj jandarǵa kórsetken kómegin, atqarǵan jumystaryn baıandap, aldaǵy josparlarymen bólisti. Sharada jaqsylyq jasap jarysyp júrgen keń júrek, aq peıil, darhan kóńil jandarǵa qala ákiminiń orynbasary óz alǵysyn jetikizip, ıgi isterine sáttilik tiledi.
Basqosýǵa arnaıy kelgen «Maǵjan ı K» JShS dırektory Maǵjan Eralıev, «Elaraı» qoǵamdyq qorynyń basshysy Ashat Baıdáýletov pen respýblıkalyq «Hareket» qaıyrymdylyq qorynyń resmı ókili Azamat Kareneev te erikti analarǵa óz rızashylyqtaryn jetkizip, qam kóńil jandarǵa qamqor bolyp, súringendi súıep, jyǵylǵandy demep júrgen belsendi jandardyń qaıyrymdy isterine qashan da qoldaý bildiretinderin jetkizdi.
Shara sońynda keńes quramyndaǵy analarǵa alǵys hattar men qaladaǵy «Muz aıdyny», «Evrazııa» keshenderine arnaıy tallondar berilip, kásipkerlerdiń qoldaýymen syı-qurmet kórsetildi.