Senattyń Konstıtýsııalyq zańnama, sot júıesi jáne quqyq qorǵaý organdary komıtetindegi Vladımır Volkovtyń tóraǵalyq etýimen bolǵan otyrysta elimizdiń shekaralas aımaqtarynda mal urlyǵynyń aldyn alý máseleleri talqylandy, dep habarlaıdy Egemen.kz.
«Bas prokýratýranyń málimetinshe, osy jyldyń 10 aıynda mal urlyǵynan kelgen shyǵyn 1 mlrd teńgeden asty. Sotqa deıingi tergeý barysynda jábirlenýshilerge tek 17% óteldi. Kórshi elderge maldy tabynymen aıdap áketken shekaralas oblystarda jaǵdaı aýyr kúıinde qalyp otyr», - dedi senator Vladımır Volkov.
Otyrysqa qatysýshy ishki ister, aýyl sharýashylyǵy mınıstrlikteriniń, Bas prokýratýranyń, Qazaqstan fermerler qaýymdastyǵynyń jáne shekara mańyndaǵy óńirlerdiń jergilikti atqarýshy organdarynyń ókilderi mal urlyǵynyń aldyn alýda birqatar problemalardyń bar ekenin atap ótip, olardy sheshý joldaryn usyndy.
Otyrys barysynda Senat depýtaty Nurlan Beknazarov Qylmystyq kodekske ózgerister engizilgenin atap ótti. Oǵan «mal urlyǵy» atty jańa bap engizilip, 8 mln teńgege deıin aıyppul salý nemese múlkin tárkileý jáne 5 jylǵa deıingi merzimge bas bostandyǵynan aıyrý kózdelgen. Alaıda mundaı isterdiń ashylýy óte tómen deńgeıde jáne qylmystardyń 41%-yn quraıdy. Ashylmaǵan qylmystardyń negizgi bóligi áleýmettik qaýip tóndiretin qylmystyń uıymdasqan túrine jatady.
«Polısııa qyzmetkerleriniń maldyń erkin jaıylýy úshin ıesiniń qaraýsyz qaldyrǵanyna silteme jasaı otyryp mal urlyǵy týraly aryzdardy tirkeýden bas tartyp otyr, sóıtip, qylmysty jasyrýdyń teris tájirıbesi jalǵasyp keledi», - dep atap ótti senator.
Nurlan Beknazarov sondaı-aq jergilikti atqarýshy organdardyń aýyldyq jerlerde mal jaıý máseleleri tıisti túrde sheshilmegenin atap ótti. Sóıtip, mal ıesi óz malynyń qaýipsizdigin qamtamasyz etýde tıisti áreket ete almaıdy.
Komıtet tóraǵasy Vladımır Volkov otyrysty qorytyndylaı kelip, mal urlyǵyna qarsy is-qımyl tek polısııanyń ǵana emes, memlekettik organdardyń, qoǵamnyń jáne fermerlerdiń birlesken jumysyn talap etetin mańyzdy máselelerdiń biri ekenin atap ótti. Der kezinde áreket etý kerek ekeni aıtyldy.
Otyrys qorytyndysy boıynsha usynymdar ázirlendi jáne ol Úkimet pen memlekettik organdarǵa jiberiletin bolady.