Myńnan ozǵan balalar

Uıymdastyrýshylardyń aıtýynsha, jobanyń negizgi maqsaty – mektep oqýshylary men túrli etnos jastary arasynda memlekettik til arqyly ulttyq qundylyqtardy nasıhattaý. «Myń bala» jobasy memlekettik til arqyly týǵan jer, salt-dástúr, baýyrmaldyq, dostyq sózderimen balalardy biriktirýdi kózdeıdi. Jyl boıy osy joba aıasynda elimizdiń barlyq óńirinde qazaq tilin oqytý baǵdarlamalary ázirlenip, túrli shara ótti. Abaıdyń 175 jyldyǵyna oraı uly oıshylǵa arnalǵan aksııa uıymdastyryldy. Jyldan-jylǵa jeńimpazdar sany artyp keledi. Bul joba jastarǵa bıikterdi baǵyndyryp, tabysqa jetýine kómektesedi dep úmit­tenemiz», dedi Qazaqstan halqy Assam­bleıasy Tóraǵasynyń orynbasary – Hatshylyq meńgerýshisi Jan­seıit Túımebaev marapattaý rásiminde.

Bıylǵy epıdemııalyq jaǵdaıǵa baılanysty joba onlaın formatta uıymdastyrylǵan. Soǵan qaramastan, qatysýshylar sanynda shek bolǵan joq. «Úmitkerler óte kóp boldy. Biz tutas Qazaqstannan úzdikterdi tańdadyq. Olardyń barlyǵy qazaq tilin jetik meńgergen, qazaq dástúrlerine qurmet kórsetip qana qoımaı, tarıhtan da jaqsy habardar», deıdi Qoldanbaly etnosaıası zertteýler ınstıtýtynyń qyzmetkeri Vıktorııa Tregýbova.

Jeńimpazdar «Til mektebi», «Asyl sóz», «Abaıdyń 175 jyldy­ǵy­na ar­nalǵan chellendj», «Tıimdi tildik orta» atty tórt atalym boıyn­sha irikteldi.

Baıqaýǵa jalpy elimiz boıynsha 1000-nan astam bala qatysyp, 65 qaty­sýshy jeńiske jetti. Onyń ishin­de Nur-Sultan qalasy boıynsha «Asyl sóz» atalymynda №52 mek­tep-gımnazııasynyń 7-synyp oqý­shysy Rýslan Zaharenko, №77 mek­tep-gımnazııasynyń 8-synyp oqý­shysy Anastasııa Te úzdik dep tanyldy. Abaıdyń 175 jyldyǵyna arnalǵan chellendj júldesin №77 mektep-gımnazııasynyń 10-synyp oqýshysy Leıla Moneron Deılın jeńip aldy. Al «Tıimdi tildik orta» atalymynda №77 Kremonezı mektep-gımnazııasynyń 7-synyp oqýshysy Djýlııa Arý jáne №79 mektep-lıseıiniń 9-synyp oqýshysy Darıa Zýeva jeńimpaz atandy. Jeńimpazdarǵa gramotalar men estelik syılyqtar berildi.