Aýǵanstan astanasy Kabýlda zymyran jarylyp, nátıjesinde 8 azamat qaza boldy. Eldegi ekstremıstik toptardyń biri – Talıban oqıǵaǵa qatysy joǵyn aıtyp, jaǵdaıdy jaýapkershiligine alýdan bas tartty.
Zymyrandar Kabýldyń «jasyl aımaǵynda», ıaǵnı elshilikter men halyqaralyq kompanııalar ornalasqan bóligine qulaǵan. Ishki ister mınıstrliginiń ókili Tarıq Arıan mán-jaıdy anyqtaý úshin arnaıy top qurylyp, zymyrandar qaıdan jiberilgeni jáne jarylý sebebi anyqtalatynyn málimdedi. «Terrorshylar zymyrandardy júk kóliginen jibergen. Istiń anyq-qanyǵy mindetti túrde anyqtalady. Ázirge 8 kisiniń qaza taýyp, 31 azamattyń jaralanǵany málim», dedi ol.
Eldegi qarýly kúshter muny terrorlyq toptarmen, ásirese DAISh-pen baılanystyrady. Bul boljamǵa olardyń Aýǵanstan arqyly qarý-jaraq tasýy sebep. Talıban jaýapkershilikten bas tartty. Olar «Aýǵanstan úkimetimen kúressek te, qoǵamdyq oryndarda qarý qoldanbaımyz» degen málimdeme jasady.