Ortalyq Saılaý komıssııasynyń kezekti otyrysynda Parlament Májilisiniń jáne máslıhattarynyń depýtattaryn saılaýdyń keıbir máseleleri pysyqtalyp, halyqaralyq baıqaýshylar akkredıtteldi.
Komıssııa otyrysyna kóterilgen birinshi másele boıynsha keıbir saıası partııalardyń saılaýǵa jiberilýi sóz boldy. Nátıjesinde, saıası partııalardy partııalyq tizim boıynsha saılanatyn Parlament Májilisiniń jáne máslıhattardyń depýtattaryn saılaýǵa jiberý týraly qaýlysyna ózgertýler engizildi. Bul másele boıynsha Qazaqstan Respýblıkasy Ortalyq saılaý komıssııasynyń múshesi Asylbek Smaǵulov sóz aldy. Ol 2020 jylǵy 5 qarashada Ortalyq saılaý komıssııasy 6 saıası partııany saılaýǵa qatysýǵa jiberý týraly qaýly qabyldaǵanyn eske saldy. Qazaqstan Respýblıkasy Ádilet mınıstrliginiń aqparaty boıynsha 2020 jylǵy 11 qarashada «Birlik» saıası partııasy qaıta tirkeýden ótip, «ADAL» saıası partııasy bolyp ataýyn ózgertse, Qazaqstan Kommýnıstik Halyq partııasy da tirkeýden ótip, Qazaqstan Halyq partııasy bolyp ózgergen. «ADAL» saıası partııasynyń jáne Qazaqstan Halyq partııasynyń barlyq fılıaldary 14 oblystyń ádilet organdarynda, sondaı-aq Nur-Sultan, Almaty jáne Shymkent qalalarynda eseptik tirkeýden qaıta ótken.
Osylaısha, Ortalyq saılaý komıssııasy qos partııany Parlament Májilisi men máslıhattary depýtattaryn saılaýǵa qatysýǵa jiberý týraly qaýly qabyldady.
Kún tártibindegi birinshi máseleni túıindeı kele, Ortalyq saılaý komıssııasynyń tóraǵasy Berik Imashev «ADAL» partııasy Túrkistan oblysyndaǵy fılıalyn qaıta tirkeýden jáne Shymkent qalasyndaǵy fılıalyn eseptik tirkeýden ótkizgenin atap ótti.Osylaısha, partııa barlyq óńirlerdegi máslıhattarǵa saılaýǵa qatysýǵa múmkindik aldy.
Otyrysqa saıası partııalardyń, Ádilet mınıstrliginiń, aýmaqtyq saılaý komıssııalary men buqaralyq aqparat quraldarynyń ókilderi onlaın qatysty.
Odan bólek, otyrysta 29 sheteldik baıqaýshy tirkeýden ótti. Bul másele boıynsha sóz alǵan Ortalyq saılaý komıssııasynyń múshesi Anastasııa Shegorsova «Saılaý týraly» Konstıtýsııalyq zańnyń 20-2-babyna sáıkes shet memleketterdiń, halyqaralyq uıymdardyń baıqaýshylaryn akkredıtteýdi Syrtqy ister mınıstrliginiń usynýy boıynsha Ortalyq saılaý komıssııasy júzege asyratynyn baıandady. Osyǵan baılanysty Syrtqy ister mınıstrligi Táýelsiz Memleketter Dostastyǵyna (TMD) qatysýshy memleketterdiń Parlamentaralyq Assambleıasynan 29 baıqaýshyny usynǵan. Olardyń barlyǵy akkredıtteldi. OSK múshesi akkredıtteýge usynystardyń kelip túsýine qaraı baıqaýshylar boıynsha derekter jańartylatynyn habarlady.