Búgin «Nazarbayev ortalygy» damytý ortalyǵynyń jańa ǵımaratynda «Tátti alma» ádebı jınaǵynyń VI tomy men «Uly dala ańyzdary» komıksteriniń tusaýkeseri ótti, - dep habarlaıdy Egemen.kz
Sharaǵa qonaq bolyp «Balapan» telearnasynyń júrgizýshileri men jańa damytý ortalyǵynyń oqýshylary kelip qatysty. Tusaýkeserdiń aldynda «Er-Tóstik batyr» men «Kenjekeı arý» balalarǵa ǵımarattyń ádemi jerlerin kórsetip, laýndj-zalǵa shaqyrdy. «Tátti almanyń» bazarlyǵy, qyzyldy-jasyldy komıkster ádemi bezendirilgen orynnyń kórkin kirgizip, dámdi dámmen toltyrylǵan ústelder qatysýshylardy qýantty.
Balalar Nursultan Nazarbaev Qory men Memlekettik tildi damytý qory shyǵarǵan «Tátti alma» ádebı jınaǵynyń VI tomy men úshtildegi komıkstermen tanysty. Osy ýaqytqa deıin ádebı jınaq óziniń jeke brendin qalyptastyryp úlgergen. Bunyń sebebi, jyldar boıǵy turaqtylyq pen maǵynaly mazmunynda. «Tátti almada» alǵashqy tomynan bastap meıirimdilik pen qorshaǵan ortaǵa degen mahabbatqa baýlıtyn áńgimeler, neshetúrli qııal-ǵajaıyp ertegiler, qyzyqty sahnalyq qoıylymdar men zamanaýı aqyndardyń óleńderi jaryq kórdi. Sonymen qatar, balalar ádebı jınaqty «Tattialma.kz» mobıldi qosymshasy men saıtynan oqı alady. Jınaqtyń 1-2 tomy Elbasynyń Memlekettik tildi damytý qoryna til jaıly jobalardy iske asyrýǵa syıǵa tartqan qarajatyna jaryq kórdi.
«Rýhanı jańǵyrý» baǵdarlamasy men Elbasynyń «Uly dalanyń jeti qyry» maqalasynda aıtylǵan ıgi maqsattardy júzege asyrý aıasynda, Memlekettik tildi damytý qory qazaq halqynyń mádenı, ádebı jáne rýhanı jetistikterin damytýǵa baǵyttalǵan jumystaryn júrgizip keledi.
Osyǵan oraı, «Uly dala ańyzdary» (Legendy velıkoı stepı) onlaın jobasy aıasynda veb-grafıkalyq romandar serııasyn ázirleýdi qolǵa alyp, qazaq, orys jáne aǵylshyn tilderindegi «Qazcomics.kz» veb-saıty men mobıldi qosymshasyn iske qosqan. Al bıylǵy jyly komıksterdi úsh tilde baspa betine shyǵardy.
«Uly dala ańyzdary» jobasy ǵasyrdan ǵasyrǵa, urpaqtan urpaqqa jetken qazaq halqynyń tarıhy men ańyzdary týraly syr shertetin «Uly mahabbat týraly jeti hıkaıa» jáne «Qazaq jeriniń uly batyrlary» dep atalatyn eki bólimnen turady. Ańyzdar mazmuny Qazaqstannyń kıeli oryndarynyń tarıhymen astasyp jatyr, áńgimeler arqaýy kópshilikke kıeli jerler týraly tolyǵyraq málimet alýǵa múmkindik beredi.
Tusaýkeserdiń sońynda balalar oıyndar oınap, suraqtarǵa jaýap berý arqyly syılyqqa komıkster men kitaptar aldy. Japondyq mangalardyń jankúıerleri bolyp úlgergen balalardyń aıtýynsha ádemi salynǵan qazaqsha mátindegi komıksterdi birinshi ret kórip tur eken.