Pavlodar oblysynyń polıseıleri tıisti ruqsatnamasy joq dinı kitaptar satqan jergilikti turǵyndardy ákimshilik jaýapkershilikke tartty, dep habarlaıdy Egemen.kz
– Pavlodar oblysy Ekibastuz qalasynyń polıseıleri 32 jastaǵy qala turǵynyn ustady. Ol ınternettegi saıttardyń birinde dinı ádebıetter satý týraly habarlandyrý bergen. Dinı ádebıetti jáne dinı mazmundaǵy ózge de materıaldardy zańsyz taratqany úshin er adamǵa qatysty QR Ákimshilik quqyq buzýshylyq týraly kodeksiniń 490-babynyń 1-bóligi (Qazaqstan Respýblıkasynyń dinı qyzmet jáne dinı birlestikter týraly zańnamasyn buzý) boıynsha ákimshilik is qozǵaldy. Materıal sheshim qabyldaý úshin sotqa jiberildi. Sondaı-aq Pavlodar qalasynda 56 jastaǵy er adam ınternet-resýrstar arqyly dinı ádebıetter satý týraly habarlandyrý bergen, er adamǵa qatysty materıal sotta qaralyp, oǵan 30 AEK kóleminde aıyppul salyndy, – dedi Ekstremızmge qarsy is-qımyl bóliminiń bastyǵy Janat Slıamov.
Polısııa qyzmetkerleri dinı sıpattaǵy ádebıetterdi taratý jáne satý úshin tıisti ruqsat qajettiligi týraly túsindirdi. Bıyl Pavlodar oblysynyń polıseıleri dinı qyzmet týraly zańnamany buzýdyń 16 faktisin anyqtady, onyń ishinde zańsyz mıssıonerlik qyzmet, ekstremıstik materıaldardy saqtaý, tirkelmegen dinı birlestik qurý jáne oǵan basshylyq etý, dinı ádebıetti jáne dinı mazmundaǵy ózge de materıaldardy zańsyz taratý faktileri bar.