Sońǵy aptada Túrkistan oblysy boıynsha koronavırýstyq ınfeksııamen 22 adam tirkelip, aýrýshańdyq aldyńǵy aptamen salystyrǵanda 8 jaǵdaıǵa ósken. Infeksııalyq stasıonarlarda 6 naýqas COVID-19 ınfeksııasynan jáne 28 adam vırýsty pnevmonııadan em qabyldaýda.
Oblystyq qoǵamdyq densaýlyq basqarmasynyń basshysy Marat Pashımovtyń málimdeýinshe, ótken táýlikte zerthanalarda koronavırýstyq ınfeksııaǵa synama tapsyrǵan 2 233 adamnyń ekeýinen oń nátıje shyqqan. Búginde oblysta test qaldyǵy – 76 763. Indettiń yqtımal ekinshi tolqynyna daıyndyq maqsatynda óńirde medısınalyq uıymdardyń materıaldyq-tehnıkalyq bazasy úzdiksiz jabdyqtalýda. 8 aýrýhanada qosymsha ottegi stansııalary ornatylǵan. Sondaı-aq 80 birlik oksıgenasııa apparaty (HI-FLOW) satyp alyndy. Budan bólek, ottegi konsentratorlarynyń sany 900-ge jetkizilip, ottegi núkteleriniń sany 2 095 núktege deıin arttyrylǵan.
Barlyq emdeý mekemelerinde 2-3 aılyq dári-dármek qory daıyn. Jedel-járdem qyzmetine 122 avtokólik qamtamasyz etý josparlanyp, búginde 77 avtokólik jetkizilgen.