Elimizdegi mektepterdiń árbirinde endi balalar ókili bolady. Mektep oqýshylary men kolledj stýdentteri arasynan saılanatyn balalar ókili ár oqý oshaǵyndaǵy balalardyń quqyqtaryn qorǵaý máselelerimen aınalysady. Bul týraly 20 qarasha – Dúnıejúzilik balalar kúni aıasynda ótken balalar ókildikteriniń alǵashqy respýblıkalyq sletinde aıtyldy.
Budan bylaı belsendi balalar barlyq ózekti másele boıynsha Bilim jáne ǵylym mınıstrliginiń janyndaǵy Balalardyń quqyqtaryn qorǵaý komıtetimen tikeleı baılanysta bolady.
Balalardyń quqyqtaryn qorǵaý Komıteti tóraǵasynyń orynbasary Iýlııa Ovechkınanyń: «Biz úshin balalarmen tikeleı jumys istep, olardy qandaı suraqtardyń qyzyqtyratynyn jáne mazalaıtynyn, óz deńgeılerinde qandaı problemalardy anyqtaıtynyn bilip, ótinishterine jaýap berý mańyzdy. Elimizde belsendi azamattyq ustanymy bar ári óz pikirlerin ashyq aıtyp, dostarynyń bastamalaryn qoldaı alatyn balalar men jasóspirimderdiń qatary qalyń. Balalar ókilderiniń barlyǵy bizdiń chatta tirkeledi. Olar mektepte oryn alǵan túrli oqıǵalar týraly habarlap, memlekettik organdar men uıymdardyń jumysyn jaqsartý boıynsha óz ıdeıalaryn, usynystaryn jetkize alady», degeninen osyny ańǵaramyz.
Buzaqylyq pen kıberbýllıngke qarsy turý, ınternet jelisinde ózin-ózi ustaý etıkasy, ekologııalyq bilim, erekshe bilim berýdi qajet etetin balalarǵa qatysty toleranttylyq máseleleri respýblıkalyq slette talqylanǵan taqyryptarǵa tuzdyq boldy. Atalǵan máselelerdiń oń sheshimin tabýǵa endi sol oqýshylardyń ózi atsalyspaq. Qoǵamdyq jumystarda óziniń belsendiligimen tanylyp júrgen 8-synyp oqýshysy, bloger Medına Maısar: «Biz joba sheńberinde balalar quqyǵyn qorǵaý tóńiregindegi máselelerge aralasa alamyz. Bul – osy salada qalyptasqan jaǵdaıdy jaqsy jaqqa ózgertip, óz úlesimizdi qosý úshin taptyrmas múmkindik», dedi.