Munaı men gazdyń ústinde otyrǵan qazynaly óńirde áli «kógildir otynnyń» ıgiligin kórmegen shaǵyn aýyldar bar. Sonyń biri – Qarabatan eldi mekeni oblys ortalyǵynan tym qashyqta emes. Osy kezge deıin temir jol boıynda ornalasqan shaǵyn aýyldy 210 múshesi bar 27 otbasy meken etti.
Olardyń deni – temirjolshylar. Kún saıyn árli-berli ótetin poıyzdardyń dybysymen tańyn atyryp, keshin batyrady demeseńiz, búgingi ıgiliktiń birde-birin kórgen joq. О́ıtkeni ótken ǵasyrdyń 60-shy jyldary salynǵan eski úılerge «kógildir otyn» jelisi tartylmady. Aýylda jóni túzý jol da salynbady. Kóshe jaryǵy múlde bolmady.
– Kóp qıyndyq kórdik. Qysta da, jazda da peshke ot jaǵý ońaı emes. Atyraý oblysy men qalasynyń ákimderine jaǵdaıymyzdy aıtyp, kóshirýdi suraǵanymyzǵa talaı jyldyń júzi boldy. Ákimder aýysqan saıyn úmitimiz oıanady. Biraq másele sheshimin tappady. Bul máseleni bıyl da kóterip, Atyraý qalasynyń ákimi Qaırat Orazbaevqa aıttyq. Endi mine, oblys, qala ákimderiniń kómegimen shahardaǵy jańa turǵyn úıge qonystanǵanymyzǵa qýanyshtymyz, – deıdi temirjol salasynyń ardageri Nazymgúl О́teýova.
Atyraý qalalyq ákimdigi óńir ortalyǵyna qonys aýdarǵan turǵyndarǵa Juldyz shaǵyn aýdanyndaǵy kóp qabatty turǵyn úıden 2 bólmeli 27 páter bóldi. Qazir 24 otbasy kóship keldi.
– Bıyl Atyraý qalalyq ákimdigi turǵyndardy jańa mekenge kóshirý úshin 813 páter bóldi. О́ıtkeni jyl basynda qalada apatty jaǵdaıdaǵy 70 úı men 10 jataqhana boldy. Sonyń ishinen 5 úı men 5 jataqhana turǵyndary jańa mekenge kóshirildi. Osylaısha, apatty úılerde turatyn turǵyndardyń 40%-y baspanamen qamtyldy. Qala ákimdigi qonys aýdarý baǵdarlamasyn jalǵastyryp, jyl sońyna deıin J.Moldaǵalıev, M.Tólebaev kóshelerindegi úsh jataqhananyń turǵyndaryn turǵyn úımen qamtýdy josparlap otyr. Bul jataqhanalardyń turǵyndary úshin 332 páter bólinedi, – deıdi qalalyq ákimdiktiń baspasóz hatshysy Nazymgúl Qaısaǵalıeva.
Atyraý oblysy