Sweet heart nemese «Tátti júrek» kondıterlik stýdııasynyń negizin qalaýshy Anargúl Jantasova ózi úshin qaıyrymdylyq jasaýdyń ómir salty ekenin maqtanyshpen aıtady. Jany jaısań, júregi jomart jannyń adamdarǵa qol ushyn berýge múmkindik týdyrǵan Zhas Project jobasyna rızashylyǵy zor.
«Zhas Project – men úshin taǵdyrsheshti joba. Nege deseńiz, men turmysqa shyǵyp, balaly bolǵandyqtan jaǵdaıyma qaraı qaıyrymdylyq jasaý isinen shettep qalǵan edim. Endi mine, jobanyń kómegimen súıikti isimmen qaıta tabystym», deıdi A.Jantasova.
Osylaısha isker kelinshek kópbalaly otbasylarǵa, múgedekterge, balalar úıiniń tárbıelenýshilerine jáne jalǵyz basty zeınetkerlerge kómektesý múmkindigine ıe boldy.
Qazirgi ýaqytta Anargúldiń komandasynda tórt adam eńbek etedi. Ásirese ol Zhas Project jobasynyń tálimgeri Anjela Alvanovanyń qoldaýyna dán rıza. О́ziniń jubaıy da qolynan kelgen kómekti kórsetip turady.
Kásipker kelinshek jobany iske asyrý úshin qajyrly eńbek pen tabandylyqtyń kerek ekenin aıtady. «Bul jerde búkil komanda saǵattyń mehanızmi syndy jumys isteıdi. Bir mln teńge grantqa kásibı mıkser, tońazytqysh, úrmeli pesh jáne barlyq qajetti asúı múkámmalyn satyp aldyq. Qazirdiń ózinde biz sheberlik sabaqtaryn ótkize bastadyq», deıdi ol.
Sweet heart kondıterlik stýdııasyndaǵy kýrstarda kóp balaly analar, jalǵyz basty analar jáne erekshe bala tárbıelep otyrǵan áıelder dáris alady. Al mundaı sanattaǵy tizimdi qaladaǵy Oktıabr aýdanynyń ákimdigi jiberip otyratyn kórinedi. Búginge deıin atalǵan stýdııada 18-55 jas aralyǵyndaǵy 44 áıel kýrstan ótip, qoldaryna táttilerdi pisirýge jáne odan paıda tabýǵa múmkindik beretin sertıfıkat ustaǵan. Endi Sweet heart basshysy aldaǵy jeltoqsan aıynda «Tańsholpan» balalar úıiniń tárbıelenýshileri úshin sheberlik sabaqtaryn uıymdastyrýdy josparlap otyr. «Ondaǵy qyz balalardy óz betinshe ómir súrýge úıretsek degen izgi nıetimiz bar. Olardy aldaǵy ómirge osy bastan daıyndaý biz úshin mańyzdy sharýa», deıdi keıipkerimiz.
Sweet heart kondıterlik stýdııasy tek kýrstar uıymdastyrýmen ǵana aınalyspaıdy. Joba qatysýshylary muqtaj jandarǵa desertter men kondıterlik ónimderdi tegin taratyp, qaıyrymdylyq isterge de belsendi túrde atsalysady. Mysaly, taıaýda kondıterler «Dobro» pansıonatynda turatyn elýge jýyq qarııa men múgedek janǵa chak-chak, tort, pırog, desertter, qytyrlaq tátti nan, baýyrsaq, keptirilgen órik pen kúnjit qosylǵan toqashtar sııaqty tátti túrlerinen beli qaıysqan ústel ázirlep, dastarqan jaıdy. Pansıonat ákimshisi Darıa Nıkolaevanyń, ondaǵy qarııalardyń Sweet heart stýdııasynyń qyzmetkerlerine, onyń bilikti basshysyna degen rızalyǵyn tilmen jetkizý tipti de múmkin emes.
Jeltoqsan aıynda áleýmettik joba aıaqtalyp, stýdııa ózin-ózi qamtamasyz etýge kóshedi. Al Arnagúl bolsa, aldaǵy ýaqytta taǵy bir óndiristik seh ashýdy kózdep júr. Tipti, qazirdiń ózinde aqyly pisirý kýrstaryn ótkizýge degen suranys ta kóptep túsip jatqan kórinedi. Sonymen qatar keıterıng qyzmetin kórsetýdi, merekeler ótkizý úshin meıramhanalarmen jáne túrli dámhanalarmen yntymaqtastyq qarym-qatynas ornatý da josparda bar.
Sweet heart stýdııasynyń isker jetekshisi Anargúl Jantasova kondıterlik ónimderdiń adam balasyna qýanysh pen merekelik sezim syılaıtynyn jaqsy sezinedi. Sol sebepti de ol óziniń súıikti isin ynta-shyntasymen atqaryp, eldiń alǵysyna bólenip júr.
QARAǴANDY