Premer-Mınıstr Asqar Mamınniń tóraǵalyǵymen ótken Úkimet otyrysynda eldi mekenderdi gazdandyrý máseleleri qaraldy, dep habarlaıdy Egemen.kz Premer-Mınıstrdiń baspasóz qyzmetine silteme jasap.
Energetıka mınıstri N. Noǵaev, Túrkistan oblysynyń ákimi О́. Shókeev, Jambyl oblysynyń ákimi B. Saparbaev, Qaraǵandy oblysynyń ákimi J. Qasymbek, Nur-Sultan qalasynyń ákimi A. Kólginov baıandama jasady.
Qazaqstanda álemdik energetıka naryǵyndaǵy sekildi energııa tasymaldaýshylardyń basqa túrlerin óndirý men tutynýǵa qaraǵanda gaz ónerkásibiniń qarqyndy damyp kele jatqany baıqalady. Bıyl QR-da gaz tutyný 16,5 mlrd m³ deıin ósedi dep kútilýde (2019 jyly tutyný kólemi 16,3 mlrd m³ qurady).
Eń aldymen, bul elektr energııasyn óndirý úshin 50% gaz, kommýnaldyq-turmystyq sektorǵa 36%, ónerkásipke 14% paıdalanatyn tutynýshylar sanynyń artýyna baılanysty. Osy jyldyń qorytyndysy boıynsha Qazaqstan halqyn gazdandyrý kórsetkishi 53% deńgeıinde josparlanǵan, 9,8 mln adam tabıǵı gazǵa qol jetkize alatyn bolady.
2025 jyly gazdandyrý deńgeıi 2120 eldi mekendi nemese 11,7 mln turǵyndy qosýmen 60%-ǵa jetedi. Buǵan "Saryarqa" jobasynyń 2 jáne 3 kezeńderin iske asyrý, Shyǵys Qazaqstandy gazdandyrý, sondaı-aq óńirlik jelilerdi keńeıtý jáne rekonstrýksııalaý yqpal etetin bolady.
Úkimet basshysy Energetıka mınıstrligine múddeli memlekettik organdarmen jáne uıymdarmen birlesip, 2021 jylǵy 1 sáýirge deıin Qazaqstandy gazdandyrýdyń bas shemasynyń ózektendirilgen jobasyn ázirleýdi tapsyrdy.
Soltústik óńirlerdi gazdandyrý maqsatynda Premer-Mınıstr 2021 jylǵy 1 naýryzǵa deıin "Saryarqa" gaz qubyry jobasynyń 2 jáne 3 kezeńderin iske asyrý boıynsha tehnıkalyq-ekonomıkalyq negizdemelerdi jańartyp, barlyq saraptamalardy alýdy tapsyrdy.
Sondaı-aq 2021 jylǵy 1 sáýirge deıin Shyǵys Qazaqstan oblysyn gazdandyrý tujyrymdamasyn daıyndaý qajettiligi atap ótildi. Túrkistan, Aqtóbe, Jambyl, Mańǵystaý, Batys Qazaqstan, Almaty oblystary men Almaty qalasynyń ákimdikterine gazben jabdyqtaý obektilerindegi aqaýlardy joıý jáne olardy keıinnen paıdalanýshy uıymdardyń teńgerimine berý úshin jergilikti bıýdjetterden qajetti qarajatty qarastyrý tapsyryldy.