Qazaqstan Respýblıkasynyń Prezıdenti Qasym-Jomart Toqaevtyń Nur Otan partııasynyń HH sezinde sóılegen sózi

 

Búginde Nur Otan partııasy el taǵdyryna jaýapty eń basty saıası kúshke aınaldy.

Halqymyz bizge qashanda zor senim artady. Ásirese jahandyq daǵdarys kezinde el amanatyna erekshe kóńil bólýimiz kerek.

Búkil álemge taraǵan pandemııa Qazaqstanǵa da ońaı tıgen joq. Memleket azamattardyń densaýlyǵyn qorǵaý úshin barlyq qajetti sharany qabyldady. Partııa tarapynan halyqqa udaıy qoldaý kórsetilip keledi.

Nur Otan belsendileri men eriktileri muqtaj jandardan kómegin aıaǵan joq. Osyndaı naqty jumys pen shynaıy janashyrlyq bereke-birligimizdi arttyra túsedi.

Qazaqstan qazirgi jaǵdaıǵa qara­mas­tan, strategııalyq damý maqsattaryn dáıekti túrde júzege asyrady. Bul rette, Elbasy saıasatynyń sabaqtastyǵyn qamtamasyz etý – negizgi mindettiń biri.

Men bıylǵy Joldaýymda partııanyń qoǵamdaǵy jetekshi róli týraly aıttym. Biz reformalardy júzege asyrý bary­syn­da Nur Otan-nyń zor áleýetine súıe­netin bolamyz.

 

Qurmetti delegattar men sezd qonaqtary!

Búginde búkil álem túbegeıli ózgeris­ter dáýirine aıaq basty. Halyqaralyq qaty­nastar júıesi barǵan saıyn belgi­siz­dik pen beıbereketsizdikke belshe­sinen batyp barady. Senim daǵdarysy týyn­daǵany anyq.

Sońǵy júz jyldyqtaǵy asa tereń resessııa álemdik ekonomıkany ondaǵan jylǵa keri yǵystyryp tastady. О́simniń burynǵy qarqyny men ornyqty damýdy qalpyna keltirý úshin orasan zor kúsh-jiger jáne ýaqyt kerek. Osynyń saldarynan kóptegen el qıyn jaǵdaıda qaldy.

Qazaqstan jetkilikti deńgeıde berik negizge ıe bolyp otyr. О́ıtkeni eń aldymen, bizdiń qarjy resýrstaryna negizdelgen naqty damý josparymyz bar.

Biz jaýapkershiligi mol mıllıon­daǵan azamatymyzdyń arqasynda ishki saıası turaqtylyqty saqtaı bildik. Son­daı-aq bıznes qoǵamdastyǵyn qol­dap, memlekettiń barlyq áleýmettik min­dettemesin oryndaı aldyq. Osy jolda halqymyzdyń dástúrli qundylyqtary – ózara kómek, tabandylyq, janashyrlyq sheshýshi ról atqardy.

Biz pandemııa kezinde azamat­tary­myzdyń shynaıy yntymaqtastyǵy men jappaı janqııarlyǵynyń kýási bol­dyq. «Biz birgemiz!» urany Qazaqstan pat­rıotızminiń formýlasyna aınaldy. Qaterli dert yryq bermegen qıyn kúnderde biz shyn máninde birge boldyq.

Partııa jáne onyń belsendileri halyqty biriktirýge orasan zor eńbek sińirdi. Naqty ister atqaratyn Nur Otan par­tııasy óziniń is-qımyly arqyly kósh­bas­shylyqqa laıyqtylyǵyn, Qazaq­stan­nyń bolashaǵy úshin búkil jaýapker­shilikti moınyna alýǵa daıyn ekenin kórsetti.

Osyndaı daǵdarys kezinde bıleýshi partııanyń, Úkimet pen búkil qoǵamnyń aldynda biregeı múmkindikter paıda bolatyny burynnan belgili. Sol tarıhı múmkindikti paıdalaný úshin biz elimizge damýdyń jańa paradıgma­syn usynýymyz qajet. Bul jerde bılik­tiń barlyq tarmaǵy: Prezıdent, Úki­met jáne zań shyǵarýshy organ kúsh jumyl­dyrýy kerek. Sondyqtan aldaǵy saılaý­dyń búkil qoǵam úshin mańyzy asa joǵary.

Tuńǵysh Prezıdent Nursultan Ábish­uly Nazarbaev Bes ınstıtýttyq reforma men Ult josparynda belgilegen júıeli jańǵyrtýlarǵa serpin berýimiz qajet. Osy maqsatpen biz 2025 jyl­ǵa deıin «О́zgerister joly: Ár aza­matqa – la­ıyqty ómir!» saılaýaldy baǵ­dar­lama­syn qabyldaımyz. Bul – jan-jaqty oılas­tyrylǵan ári naqty júzege asatyn qujat.

Ekonomıkadaǵy qıyndyqtarǵa qara­mastan, Nur Otan partııasy baǵdarlamany júzege asyrý úshin Úkimetpen birlesip, aldaǵy besjyldyqqa 21 trıllıon teńge bólýdi josparlap otyr. Baǵdarlamada el­d­iń áleýmettik ilgerileýine jáne ha­lyq­­tyń ál-aýqatyn arttyrýǵa baǵyt­talǵan naqty ári tıimdi sharalar usy­ny­lady.

Partııa jurtshylyqtan kelip túsken usynys-tilekterdi nazarǵa aldy. Bizdiń baǵdarlamamyzdy búkil elimiz daıyndady deýge tolyq negiz bar.

 

Qurmetti partııalastar, joldastar!

Bizdiń baǵdarlamamyzda negizgi tórt basymdyq bar.

BIRINShI – Ár azamatqa óz áleýetin júzege asyrý úshin teń múmkindik berý.

Biz áleýmettik-ekonomıkalyq saıasatta naryq tásilderin basshylyqqa alamyz. Qarjyny jáne járdemaqyny negizsiz ońdy-soldy taratýdy doǵarý qajet. Memleket ataýly áleýmettik kómekti shyn máninde muqtaj adamdarǵa berý kerek.

Eń bastysy – áleýmettik ádildik. Sol se­bepti muqtaj jandarǵa qamqorlyq jasaýǵa basa mán beremiz. Áleýmettik saıa­satty júrgizgende qıyndyqqa tap bolǵan azamattarǵa ataýly kómek kórsetý sharalary kúsheıtiledi.

Aldaǵy bes jyl ishinde áleýmettik tólemderdi jyl saıyn ındeksteý úshin 3 trıllıon teńgeden astam qarajat bólinedi. Ortaq zeınetaqy mólsheri de jyl saıyn ındeksteletin bolady. Bul rette, biz muny ınflıasııa deńgeıine 2 paıyz qosyp júzege asyrýdy usynyp otyrmyz.

Turaqty kútimge muqtaj jáne jeke kómekshi qyzmetin paıdalanbaıtyn birin­shi toptaǵy múmkindigi shekteýli azamat­tardyń barlyǵyna qosymsha áleýmettik qoldaý kórsetiledi. Osyǵan oraı beriletin arnaýly járdemaqy eń tómengi kúnkóris deńgeıiniń 1,4 ese kóbeıtilgen mólsherine teń bolady. Aldaǵy bes jyl ishinde biz erekshe kútimdi qajetsinetin adamdardy arnaýly tehnıkalyq quraldarmen qam­tamasyz etemiz. Sondaı-aq olarǵa tolyq­taı ońaltý-saýyqtyrý qyzmetteri usynylady.

Biraq eń bastysy, ár adamǵa tabys tabý múmkindigin berý kerek. Bul rette, biz naq­ty sharalar qabyldaımyz. Sonyń nátı­jesinde, 2025 jylǵa qaraı múmkindigi shekteýli azamattardy jumyspen qamtý kórsetkishi 30 paıyzǵa jetedi.

Osyndaı jandardyń kásibı qyzmet­pen aınalysýymen birge, bilim alýyna da jaǵdaı jasaý mańyzdy. Bes jyl ishinde kolledjder men joǵary oqý oryndary ınklıýzıvti bilim berý júıesimen tolyq qamtylady. Sonymen qatar mektepke deıingi barlyq mekeme men mektepterde bul kórsetkishti kezeń-kezeńmen 70 paıyzǵa deıin jetkizemiz.

Biz tek áleýmettik kómekke muqtaj jan­darǵa ǵana emes, halyqtyń ózge de top­taryna qoldaý kórsetemiz.

Partııalyq tizimdegi 20 paıyzdyq kvo­ta jas kóshbasshylardy qoldaýdyń naqty tetigine aınaldy. Nur Otan-nyń qataryna bilimdi, qaısar jáne jigerli jastar qosyldy.

Áıelderdiń qoǵamdyq-saıası ómirdegi, ekonomıkanyń barlyq sektoryndaǵy rólin kúsheıtý – álemdik úrdis. Qazirgi ýaqytta partııalyq tizimniń 30 paıyzy áıelderden quralǵan. Bul – áıelder qaýymy úshin memleket basqarý isine atsalysýǵa jol ashatyn naqty áleýmettik múmkindik.

Partııanyń belsendi qatysýymen Áleýmettik kodeks ázirlenedi. Bul mazmuny jaǵynan múlde jańa qujat bolmaq. Kodekste qoǵam men memleket arasyndaǵy ózara kelisim ornatýdyń tyń tásilderi kórsetiletin bolady.  

EKINShI BASYMDYQ – salamatty zııatker ult qalyptastyrý.

Jańa jahandyq syn-qaterler eskerile otyryp, bilim, ǵylym, densaýlyq saqtaý, mádenıet jáne sport salalaryna jumsalatyn qarajat ulǵaıtylatyn bolady. Bul – adam kapıtalyna, elimizdiń bolashaǵyna salynatyn strategııalyq ınvestısııa.

Densaýlyq saqtaý salasyn qarjy­lan­dyrý kólemi ishki jalpy ónimniń 5 paıy­zynan kem bolmaıdy. Jańa epıdemııa­larǵa árdaıym daıyn bolý kerek. Sıfr­landyrýdy, telemedısınany, bıo­lo­gııalyq qaýipsizdik ınfraqurylymyn qamtıtyn Birtutas ulttyq júıe qurý isi aıaqtalady.

Nur-Sultan men Almaty qalalarynda kópbeıindi eki ǵylymı-ınnovasııalyq klınıka salynady. О́ńirlik medısınany damytý úshin biz elimizdiń barlyq oblysynda 20 zamanaýı medısınalyq ortalyq salatyn bolamyz. Aýdandyq aýrýhanalar men perzenthanalardy, aýyldyq emdeý mekemelerin barlyq qajetti qural-jabdyqpen qamtamasyz etemiz.

2023 jylǵa qaraı dárigerlerdiń eń­bek­aqysy 2,5 ese ósedi.

Basty maqsat – qazaqstandyqtardyń ortasha ómir súrý jasyn 75-ke deıin uzartý.

Salamatty ómir salty men buqaralyq sportty damytý zor mańyzǵa ıe. Sondyqtan balalar men jasóspirimder klýbtaryn tek shaǵyn jáne ortasha qalalarda ǵana emes, sondaı-aq tirek bolarlyq bar­lyq aýylda ashý qajet. Sonymen qatar jattyqtyrýshy-oqytýshylardyń eńbekaqysyn kóterý kerek. Árbir aýyl­dyq okrýgte sport jónindegi nusqaýshy laýa­zymyn engizgen jón.

 

Qurmetti sezge qatysýshylar!

Elimiz básekege qabiletti bolý úshin bilim jáne mádenıet salasyn órken­de­týge, jastardy qoldaýǵa basa mán berýi­miz kerek.

Búkil Qazaqstan boıynsha 800 jańa mektep salynady. Sonyń nátıjesinde biz apatty jáne úsh aýysymmen oqytatyn mektepterdiń máselesin tolyq sheshemiz. Barlyq mektep ınternetpen, kompıýtermen jáne pándik kabınettermen qamtamasyz etiledi.

Aýyl mektepteriniń damýyna erekshe kóńil bólinedi. Shaǵyn qalalar men aýdan ortalyqtarynda, aýyldyq jerlerde ornalasqan 5 myńnan astam mektep jańǵyrtylýy kerek. Pedagog mamandarǵa suranysty arttyryp, bilim sapasyn jaqsartý maqsatynda olardyń jalaqysy 2 ese kóbeıedi. 

Jahandyq bilim jáne ınnovasııalyq júıege engen zamanaýı zertteý ýnıver­sı­tetteri bilim ekonomıkasynyń negizin quraýǵa tıis. Nazarbaev Ýnıversıtetiniń tájirıbesi boıynsha taǵy da kem degende 2 ozyq óńirlik joǵary oqý orny ashylady. 2025 jylǵa qaraı joǵary bilim alý úshin bólinetin granttyń sany 50 paıyzǵa artady. Bul – 75 myń jas azamatymyz joǵary bilimdi tegin alady degen sóz.

Biz stýdentterge materıaldyq qoldaý kórsetý isin jalǵastyra beremiz. Stý­dent­terdiń stıpendııasy 2 esege, magıs­trant­tar men doktoranttardyń stıpendııa­sy 1,5 esege kóbeıedi. 2025 jylǵa qaraı kolledjder men ýnıversıtetter jataq­hanalaryndaǵy oryndar sany kem degende 50 myńǵa artady.

«Alǵashqy jumys orny» jobasy iske qosylady. Bul joba jylyna 5 myń adamdy qamtıtyn bolady. Bıznes sala­syndaǵy keleshegi zor ıdeıalardy júzege asyrý úshin jas kásipkerlerge jyl saıyn 10 myń grant usynylady.

Jumys istep júrgen jastarǵa jylyna 3 myń jaldamaly páter beriledi. Biz jastar uıymdary men Eriktiler qozǵalysynyń jobalaryn qarjylandyrý kólemin 1,5 esege arttyrýǵa ázirmiz. Osyndaı qoldaý sharalary oqymaıtyn jáne jumys istemeıtin jastardyń sanyn 2025 jylǵa qaraı 100 myń adamǵa azaıtýǵa múmkindik beredi.

Sonymen qatar balalarǵa qosymsha bilim berý, bos ýaqytty tıimdi paıdalaný, shyǵarmashylyq qabiletti damytý máseleleri sheshimin tabady. Barlyq mektepte sportpen jáne shyǵarmashylyqpen aınalysýǵa jaǵdaı jasalady. 3-6 jas aralyǵyndaǵy balalar mektepke deıingi bilimmen tolyq qamtylýǵa tıis. Osy rette, turǵylyqty jerine qaramastan balanyń bárine birdeı kóńil bólinedi.

Biz «Rýhanı jańǵyrý» baǵdarlamasyn belsendi túrde júzege asyra beremiz. Bul asa mańyzdy qujat urpaqtyń sanasyn serpiltip, ulttyń jańa bolmysyn qalyptastyrýǵa arqaý bolady.

Budan bólek, memlekettik tildiń qoldanylý aıasyn odan ári keńeıtýge kúsh jumyldyramyz. Ana tilimizdi ardaq­tamasaq – eldigimizge syn.

Kez kelgen sharýashylyq qyzmetimen aınalysqan jaǵdaıda tabıǵatty saq­taý jáne ony qorǵaý mindeti basty qaǵı­dattyń birine aınalady. Jańa Ekolo­gııalyq kodeks jáne «Jasyl ósim» tujy­rymdamasy qabyldanady.

Biz pragmatızm qundylyqtaryn, únem­dilik, qanaǵatshyldyq jáne ustamdylyq mádenıetin ornyqtyrýymyz kerek.

ÚShINShI BASYMDYQ – ekonomıka men óńirlerdiń ornyqty damýy.

Álemdik ekonomıkanyń uzaq merzimdi daǵdarysqa tap bolyp otyrǵany anyq. Árıne, Qazaqstan da budan edáýir qysym kóretini belgili. Degenmen, daǵdarys – ja­­ńa ekonomıkalyq model qurý úshin jú­ıe­­li reformalar júrgizýdiń múmkin­digi.

Búkil álemdik ekonomıka ǵylymy men sanaly saıasatkerler adamzat tarıhynda buryn-sońdy bolyp kórmegen ja­han­dyq daǵdarys jaǵdaıynda memle­kettiń ekonomıkalyq úderisterdi basqa­rý­d­aǵy róli shyn máninde artady degen qorytyndyǵa kelip otyr. Qalaı degende de, osylaı bolýǵa tıis.

Úkimetterdiń basty mindeti – óz mem­leketi azamattarynyń turmys sapasyn laıyqty qamtamasyz etý. Bizdiń Úkimet osy irgeli maqsatqa qol jetkizýdi kózdep otyr.

Ekonomıkalyq ósimge qol jetkizý úshin negizinen mynadaı máselelerge basa mán beriledi:

– qatań, biraq teńgerimdi makro­eko­nomıkalyq saıasat;

– jeke sektordy qoldaý;

– azamattar aldyndaǵy áleýmettik mindettemelerdi oryndaý.

Mundaı strategııa bıýdjet shyǵyn­daryn qatań baqylaýǵa alýǵa, tıimsiz jeńil­dikter men sýbsıdııalardy alyp tastaýǵa, tómen ınflıasııany saqtaýǵa jáne teńgeniń erkin baǵamyn ustanýǵa negiz­deledi.

Fıskaldi salada bıýdjet shyǵyndary ońtaılandyrylady, munaı tapshylyǵy qysqarady, ult baılyǵyn ádiletti bólý qamtamasyz etiledi. Aqsha-nesıe saıasaty jalpyulttyq áleýmettik-ekonomıkalyq basymdyqtar turǵysynan júzege asyrylady. Nátıjesinde bıýdjettiń munaıdan tys bóliginiń tapshylyǵy 2025 jylǵa qaraı, Úkimettiń esebi boıynsha – 6 pa­ıyzdy, al jalpy tapshylyq 3 paıyzdan aspaıtyn kólemdi quraıtyn bolady.

Úsh jyl ishinde ınflıasııa 4 paıyz­ǵa, tipti bul kórsetkishten de tómen deń­geıge deıin azaıýy yqtımal. Indýs­trııa­landyrýdyń belsendi júrgizilýi óńdeýshi ónerkásiptegi óndiris kólemin 1,5 ese ulǵaıtýǵa jol ashady.

Biz úshin jańa baǵyttar – IT salasy men týrızmge shyn máninde basymdyq berý kerek. Osy eki sala boıynsha 300 myńǵa jýyq jańa jumys orny ashylady.

Málimetterdi óńdeý men saqtaý salasyna salynatyn ınvestısııalar 6 ese ulǵaıady. Biz Qazaqstannyń eksportyn da belsendi túrde ilgeriletetin bolamyz. Maqsatymyz – shıkizattyq emes eksport kólemin 2 ese, ıaǵnı jylyna 40 mıllıard dollarǵa deıin ulǵaıtý. Agrarlyq sektor da zor áleýetke ıe. Salany damytýdyń jańa modeline qaraı qadam basý kerek. Barlyq qarjylyq jáne qarjylyq emes qoldaý tetikterin strategııalyq mindetterdi sheshýge baǵyttap, tolyǵymen sıfrlandyrý qajet.

Aýyl sharýashylyǵy ónimderin óndi­re­tin jáne óńdeıtin 7 iri ekojúıe qurylatyn bolady. Buǵan 350 myń fermerlik jáne úı sharýashylyqtary jumyldyrylady. Bul degenimiz – aýyldyqtar úshin jańa jumys oryndary ári turaqty tabys kózi.

600 myń gektardan astam jańa sýarmaly jerlerdi ıgerý jóninde sharalar qabyldaǵan jón.

2025 jylǵa qaraı aýyl sharýa­shy­lyǵynyń jıyntyq óniminiń kólemi úshten birindeı mólsherge, al eksport kólemi 2 esege deıin ulǵaıady.

Kásipkerlikti qoldaý aıasynda báseke­lestikti damytýǵa, zań ústemdigin nyǵaıtý men sot júıesin jańǵyrtýǵa aıryqsha nazar aýdarylady. Bul – negizgi baǵyttar. Onsyz tıimdi naryqtyq ekonomıkany qurý múmkin emes.

Qazaqstan bıznes júrgizý úshin qo­laıly sharttar jasalǵan, meılinshe damy­ǵan elder qataryna qosylýǵa tıis. Bız­neske jasalǵan kez kelgen zańsyz kedergi aýyr qylmys retinde qarastyrylatyn bolady.

Tikeleı sheteldik ınvestısııa kólemin jylyna 30 mıllıard dollarǵa jetkizýdi de josparlap otyrmyz.

Shaǵyn jáne orta bızneske jan-jaqty qoldaý kórsetiledi. 2025 jylǵa qaraı shaǵyn jáne orta bıznes 4 mıllıon qazaqstandyqty jumyspen qamtyp, ishki jalpy ónimniń 35 paıyzyn óndiredi. 50 myń azamatymyz, eń aldymen, aýyl turǵyndary, óz bıznesin ashý úshin shaǵyn nesıe alady. Josparlanǵan ekonomıkalyq baǵdardy júzege asyrý 2025 jylǵa qaraı jyl saıynǵy ósim qarqynyn 5 paıyzdan joǵary deńgeıde qamtamasyz etýge múmkindik beredi.

О́ńirlerdegi turmys sapasyn jaqsartý basty nazarymyzda bolady. Jańa óńirlik standarttarǵa sáıkes 3,5 myńnan astam aýyl jańǵyrtylatyn bolady. Barlyq qalalar men aýyldar sýmen qamtamasyz etiledi. 246 iri eldi mekenge gaz tartylady. Mundaı eldi mekenderde 900 myń adam turady. Olardyń 350 myńnan astamy – Nur-Sultan, Qaraǵandy, Jezqazǵan jáne Temirtaý qalalarynyń turǵyndary.

53 tazalaý qondyrǵysyn ornatý jáne jańǵyrtý arqyly elimizdiń barlyq óńirindegi aǵyn sýdy tazartýǵa múmkindik týady. Bul – osy saladaǵy túıtkildi máseleniń utymdy sheshimi bolmaq.

Jol qurylysy qolǵa alynady. Ár aýylǵa deıingi barlyq joldar, ıaǵnı 27 myń shaqyrym jol jóndeýden ótkiziledi.

Oblys ortalyqtary men respýb­lıkalyq mańyzy bar qalalar jyldamdyǵy joǵary 5G ınternetimen qamtamasyz etiledi. Sonymen qatar aýyldardyń 99 paıyzy osyndaı múmkindikke ıe bolady.

Aýyldyq jerlerge qajet mamandardy, dárigerlerdi, muǵalimderdi tar­­týǵa nazar aýdarylady. Olarǵa úı sa­lý úshin jylyna 22 myń jer telimi bó­li­­­­nedi. Oblys ortalyqtarynda já­ne sha­ǵyn qalalarda jylyna 25 myń jer telimi beriledi. Jalpy alǵan­da, al­daǵy bes jylda shamamen bir mıl­­lıon ot­basy úshin 100 mıllıon sharshy metr­­den astam turǵyn úı salynady. So­nyń ishin­de 300 myńǵa jýyq páterdi áleý­mettik turǵyn úı retinde jeńildik­pen paıdalanýǵa bolady.

Shól dala máselesin, Semeı ıadrolyq polıgony, «Baıqońyr» kosmodromy tóńiregindegi ekologııalyq túıtkilderdi sheshý jumystary jalǵasyn tabady.

Araldyń soltústik bóligin qalpyna keltirý jáne Jaıyq ózeni alabynyń ekologııalyq júıesin saýyqtyrý jóninde sharalar qabyldanady.

TО́RTINShI BASYMDYQ – esep beretin, «halyq únine qulaq asatyn» memleket jáne jaýapty azamattar.

Memleket pen qoǵamnyń ózara senim men jaýapkershilik qaǵıdattaryna negizdelgen ózara is-qımylynsyz eldiń júıeli jáne turaqty damýy múmkin emes.

El úshin kúrdeli ýaqytta partııa ha­lyqq­a etene jaqyndaı túsedi. Bizdiń min­detimiz – azamattardyń ózin jáne urpaq­taryn laıyqty turmyspen qamtamasyz etsem degen ádil ári oryndy tilegimen ushta­syp jatqan nıettestik pen is-qımyl birligine qol jetkizý. Taǵy da atap óteıin, bizdiń jumysymyzdaǵy basty baǵdar – jurt­shylyqtyń talap-tilekteri men muń-muqtaj­dyqtary. Memleket halyqtyń úni men pikirine qulaq asýǵa mindetti. Parla­ment pen halyqqa esep beretin Úkimet dál osy baǵytta jumys isteıtin bolady. Bul úshin bizder, partııalastar, qoǵamymyzdy tolǵandyratyn barlyq máseleni jaqsy bilýge, onyń jyldam ári tıimdi sheshimin tabýǵa tıispiz.

Partııa jumysynyń tıimdi is-qımyl koefısıenti azamattarymyzdyń turmy­syn jaqsartatyn tájirıbelik sheshimderge baılanysty bolady. Bos sóz ben qur ýáde emes, naqty is qana halyq senimi men saıası kóshbasshylyq úshin kúrestegi eń myqty argýment bola alady. Sondyqtan partııa memlekettik basqarý júıesin jańǵyrtýmen tikeleı aınalysady. Bul – strategııalyq sıpaty bar mindet.

Bizdiń negizgi basymdyǵymyz – sybaı­las jemqorlyqpen kúres. Bul – naýqan­shyl­dyq emes, salmaqty, júıeli jumys. Mem­lekettik organdardyń qyzmeti ashyq ári jurtshylyqtyń udaıy baqylaýynda bolýǵa tıis.

Volonterlikti jáne úkimettik emes sektordy jan-jaqty qoldaý – eldi ornyqty damytýdyń kepili. Qoǵam men azamattyq sektor memleket qyzmetiniń barlyq mańyzdy máseleleri boıynsha sheshim qabyldaý úderisine tolyqqandy atsalysýǵa tıis.

Sonymen qatar partııa Jergilikti ózin-ózi basqarý tujyrymdamasyn belsendi ilgeriletetin bolady. Bul qujatta aýyl ákimderin saılaý, «halyq atsalysatyn» bıýdjetti retteý, jergilikti bılik organdaryna azamattyq baqylaý júrgizý máseleleri qamtylady.

Álbette, jergilikti ózin-ózi basqarý reformasy osymen toqtap qalmaıdy. Partııa paıdaly nátıjelerge qol jetkizýine qaraı osy saladaǵy tıimdi qurylymdardy odan ári ilgeriletýmen aınalysady.

 

Qymbatty partııalastar!

Kóptegen mańyzdy bastamalar men partııa josparlaǵan ózgerister Elba­sy­nyń baǵdarlamalyq turǵyda sóılegen sóz­derinde jáne meniń Qazaqstan halqy­na Joldaýlarymda kórinis tapqan. Par­tııa­myzdyń negizin qalaǵan Qazaq­stan­nyń Tuńǵysh Prezıdenti strategııasynyń sabaq­tastyǵyn saqtaı otyryp, biz ha­lyq­tyń turmysyn jaqsartýǵa jáne memle­ket­tiń áleýetin kúsheıtýge baǵyttalǵan bar­lyq jospardy naqty iske asyrýǵa nıettimiz.

Saıasattyń sabaqtastyǵy degenimiz jaýap­kershilik, uıymshyldyq, eńbek uǵym­darymen ózektes ekenin qaperde ustaǵan jón. Jaýapsyz sózýar saıasatkerler óz memleketteriniń qaýipsizdigine qater tóndirip, barlyq ıgilikten op-ońaı bas tartady. Al Brest bitiminen bastap, Kavkazdaǵy sońǵy oqıǵalarǵa deıingi jańa tarıhtan biletinimiz – saıası kataklızmder men qaqtyǵystar terrıtorııadan da aıyrylýǵa ákep soqtyrýy múmkin.

Nur Otan partııasy – izgi nıetke negizdelgen naqty ister partııasy. Qazaqstannyń jarqyn bolashaǵy úshin zor jaýapkershilik bizge júktelgen. Otanymyzdyń taǵdyry partııanyń strategııasyn qoldaıtyn belsendi músheleriniń, shynaıy patrıottardyń qolynda.

Elimizdiń aldynda turǵan jańa jahandyq syn-tegeýrinder men qaýip-qaterler bar kúsh-jigerimizdi biriktirýdi talap etedi. Ol úshin búkil qoǵamnyń ortaq iske jumylýy qajet. Barlyq maqsatymyzǵa tek birlik men kelisim arqyly jete alamyz. Sondyqtan elimizde saıası dıalog mádenıetin júıeli túrde damytý mańyzdy.

Nur Otan tutas ultty biriktiretin bastamalardy usynyp otyr. Aldaǵy ýaqytta da solaı bolady. Partııa zań ústemdigi qaǵıdatyn keńinen engizedi. Tıisti zańdylyq, sodan týyndaıtyn tártip pen úılesim bolmasa, qoǵamda ilgerileýge qol jetkizý múmkin emes. Bul – álemdik tájirıbede áldeqashan ornyqqan aksıoma.

Bizdiń baǵdarlama damyǵan azamattyq qoǵam men ekonomıkalyq turǵydan kemeldengen memleket qurýdy kózdeıdi. Biz basqarýshy partııa mártebesine ıe bolýdyń máni bılik ókilettikterine qol jetkizý emes, el-jurtqa naqty paıda ákelýge múmkindik alý ekenin árdaıym este saqtaýǵa tıispiz.

Partııa músheleri, ásirese memlekettik basqarý júıesindegi joǵary laýa­zymda otyrǵan azamattar, shynaıy eńbek­qor­lyqtyń, saıası jaýapkershiliktiń, aza­mat­tyq patrıotızmniń ozyq úlgisin kórsetýi kerek. Partııalastarymyzdyń bolashaqta da dál osy ustanymǵa saı bolatynyna kúmánim joq.

 

Asa qurmetti Nursultan Ábishuly!

Qurmetti sezge qatysýshylar!

Táýelsizdigimizdiń 30 jyldyǵy Májilis jáne máslıhat depýtattarynyń saılaýymen bastalmaq. Munyń sımvoldyq máni zor. Bul doda barlyq mereıtoılyq is-sharalarǵa ıdeologııalyq jáne mazmundyq turǵydan tyń serpin beretini anyq. Aldaǵy saılaý qoǵamnyń birtutastyǵyn jáne bereke-birligimizdi bekemdeı túsedi dep senemin. Bul naýqannyń ashyq, ádil ári zańdy ótýi úshin barlyq jaǵdaıdy jasaımyz. Men, Memleket basshysy retinde, muny jiti qadaǵalaımyn. Osyǵan oraı Ortalyq saılaý komıssııasyna jáne Bas prokýratýraǵa naqty tapsyrma berdim.

Barsha saılaýshylardy azamattyq belsendilik tanytyp, saılaýǵa qatysýǵa shaqyramyn. Elimizdiń ıgiligi jáne memleketimizdiń múddesi jolynda tabysqa birge jete bereıik!

Otanymyz máńgi jasasyn!

Halqymyz árqashanda aman bolsyn!