Ekologııa, geologııa jáne tabıǵı resýrstar mınıstri Maǵzum Myrzaǵalıev Úkimet otyrysynda otandyq ekobelsendilerimen birlesip, óńirlerdegi ekologııalyq ahýaldy jaqsartýǵa baılanysty jol kartalaryn tanystyrdy.
Vedomstvo basshysy qorshaǵan ortany jaqsartýǵa baǵyttalǵan Ekologııalyq kodekstiń jobasy Májiliste maquldanyp, Senattyń qaraýyna jiberilgenin aıtty.
«Jańa ekologııalyq kodekstiń qabyldanýyn kútpeı «Halyq únine qulaq asatyn memleket» tujyrymdamasyna sáıkes, ekologııalyq problemalar men olardy halyqpen, ásirese barlyq óńirlerdegi ekobelsendilermen sheshý joldary qarastyryldy. Barlyǵy on jeti onlaın kezdesý ótkizildi. Olarǵa jıyrma bes myńǵa jýyq adam qatysty», dedi mınıstr.
О́ńirlerdegi ekologııalyq ahýaldy jaqsartýdy kózdeıtin on jeti jol kartasy ázirlendi. Aıtalyq, Qaraǵandy oblysynyń ekologııalyq jaǵdaıyn jaqsartý úshin daıyndalǵan Jol kartasynda elý jeti is-shara qarastyrylǵan. Olardyń arasynda «ArselorMıttal Temirtaý» kásipornynda qazandyq jáne gaz tazalaý jabdyǵyn qaıta jańartý, ák kúıdirý sehyn Temirtaý qalasynan tys shyǵarý jáne Jezqazǵan qalasynda «Qazaqmys» kásipornynyń jańa kúkirt qyshqyly sehyn salýdy aıtýǵa bolady.
Bul sharalar qorshaǵan ortaǵa teris áserdi tómendetýge múmkindik beredi. Sonymen qosa Temirtaý qalasynda óndiristik aǵyndy sýlardy tazartý torabyn jáne Balqash pen Jezqazǵanda jańa kárizdik tazartý keshenderin salý, «ArselorMıttal Temirtaý» qaldyqtaryn kádege jaratý, Jezqazǵanda bıoelektrostansasyn salý jáne «Darıal-Ý» jerlerin qalpyna keltirý josparlanǵan.
Almaty boıynsha Jol kartasynda jıyrma is-shara qarastyrylǵan. Olardyń ishinde: JEO-2 jáne JEO-3 gazǵa aýystyrý, qalaǵa irgeles jatqan jeke sektor aýdandaryn gazdandyrý, kommýnaldyq qyzmetter men qoǵamdyq kólik qyzmetindegi avtokólikterdi syǵylǵan tabıǵı gazǵa aýystyrý, dızeldi otynmen júretin qoǵamdyq kólikterge kezeń-kezeńimen tyıym salý, sol sekildi kógaldandyrý baǵytyndaǵy jumystar qarastyrylǵan.