Mór soǵylǵan qujattary qoldarynda. Soǵan qaramastan Shyǵys Qazaqstandaǵy 13 sharýa qojalyq ıesinen memleketten berilgen sýbsıdııany qaıtarý kerektigi talap etilgen.
Olar demeý qarjyny qystaqtaryna kún panelderin ornatqandary úshin alǵan eken. Alaıda aımaqtaǵy aýyl sharýashylyǵy basqaramasy qojalyqtarǵa hat joldap, artyq berilip qoıǵan aqshany qaıtarý kerektigin aıtqan.
Sýbsıdııanyń bir bóligin qaıtarý qajet degen mazmundaǵy hat taıaýda qojalyq ıesi Saǵyndyq Saparovqa da kelgen. Onyń sharýashylyǵy taýly jerde ornalasqandyqtan elektr jelisi tartylmaǵan. Maıshamnyń jaryǵymen otyratyn emes, satylymda bolǵan soń kún panelderin ornatqan. Sol úshin de memleketten 2 920 000 teńge ınvestısııalyq sýbsıdııa alǵan.
– Qajetti qujattyń bárine mór men qol qoıylyp, sýbsıdııa alǵanbyz. Endi mine, 480 myń teńge artyq ketip qalypty dep jatyr. Kelisimshartta úsh mór basylǵan, qol qoıyp ózderi bergen. Endi osyny qaıta buzyp jatyr. Osy durys pa? – deıdi Saǵyndyq Saparov.
Saparovtardyń bul qystaqta taban et, mańdaı terimen tórt túligin baǵyp otyrǵandaryna 45 jyl bolǵan. Jarty ǵasyrǵa jýyq ýaqyt. Kún kózinen elektr qýatyn alatyn panelderin ornatýǵa ketken shyǵynnyń 80 paıyzyn memleket ótep bergende qýanyshtan bórikterin aspanǵa atqan. Memeleketten mundaı kómekti alǵash ret alǵan soń qýanbaı qaıtsin?!
– Bergen qarjyny qaıtaryńdar degeni aqylǵa qonbaıdy. Durys emes. Biz endi ony qalaı qaıtaramyz?! Ony oblystyq aýyl sharýashylyǵy basqarmasynyń durys eseptemeı bergenine biz kináli emespiz, – deıdi Qumkól aýylynyń turǵyny Tóleý Qadırova.
Qojalyq ıeleri sýbsıdııany alýda da az áýrelenbegen sııaqty. Sýbsıdııa berý erejeleri ózgerip, qyl aıaǵy shytyrman iske prokýratýra aralasqannan keıin ǵana sharýalar qarjyǵa qol jetkizgen.
– Revızııalyq komıssııa teksergen kezde berilgen sýbsıdııany zańsyz dep, artyq aqshany úkimetke qaıtarý kerektigin habardar etip ketti, – dedi oblystyq aýyl sharýashylyǵy basshysynyń orynbasary Erbol Qýanyshev.
Shyǵystaǵy sharýalardyń kún panelderin jappaı qoldana bastaǵandaryna eki-úsh jyl bolǵan. Qojalyqtarǵa ınvestısııalyq sýbsıdııa retinde barlyǵy 5 mlrd teńgeden astam qarjy berilgen.
Osy salaǵa jaýapty laýazymdy tulǵalar jyldyń basynda unnyń ishine aqsha jasyryp, 35 mln teńge para aldy degen kúdikpen ustalǵany da eldiń esinde. Ol qylmystyq is áli tergelip jatyr. Al sýbsıdııany artyq alyp qoıdy degen sharýalar qaıtpek?!
Shyǵys Qazaqstan oblysy