Shymkent garnızonynyń áskerı bóliminde áskerı qyzmet qaýipsizdigi talaptaryn zerdeleý boıynsha keshendi praktıkalyq sabaqtar ótkizildi, dep habarlaıdy Egemen.kz.
Sabaqtar jeke quramdy, birinshi kezekte jas býyndy, óziniń qyzmettik mindetterin oryndaýdyń qaýipsiz tásilderin, qarý-jaraq pen tehnıkaǵa qyzmet kórsetý kezinde oqıǵalardyń aldyn alý, sondaı-aq manekender men maketterde qaýipsizdik talaptaryn saqtamaýdyń naqty saldarlaryn kórsetý úshin ótkizildi. Jeke quram sabaq baǵdarlamasyn tolyq meńgere alatyndaı 12 oqý orny jabdyqtaldy.
Oqý oryndarynda áskerı qyzmetshilerge áskerı tehnıkany paıdalaný, qarý-jaraqqa qyzmet kórsetý erejelerin, ýly zattardy paıdalaný kezindegi saqtyq sharalaryn, qaraýylda qyzmet ótkerý kezinde jáne atys daıarlyǵy boıynsha sabaqtar barysynda qaýipsizdik talaptaryn, sondaı-aq alǵashqy medısınalyq kómek kórsetýdi kórnekilep kórsetti jáne túsindirdi. Barlyq teorııalyq bólim qarý-jaraq pen áskerı tehnıkanyń naqty úlgilerinde praktıkalyq kórsetildi.
Sondaı-aq, áskerı qyzmetshilerge jarylǵysh zattar men oq-dárilerdiń negizgi sıpattamalary jáne olarmen jumys isteý kezindegi qaýipsizdik tehnıkasy týraly aıtyldy.
Sabaq qorytyndysynda erekshe nazar alǵashqy medısınalyq kómekke aýdaryldy. Sanıtarlyq nusqaýshy áskerı qyzmetshilerge túrli jaraqattar men ómirge qaýip tóngen kezde alǵashqy medısınalyq kómek kórsetý erejelerin eske saldy jáne sanıtarlyq-epıdemııalyq qaýipsizdik erejeleri men óz densaýlyǵyn baqylaý týraly taǵy da aıtyp ótti.