Bilim jáne ǵylym mınıstrligi Ǵylym komıtetiniń qamqorlyǵymen Clarivate Analytics kompanııasy jyl saıyn joǵary bilim berý oryndarynyń, ǵylymı jýrnaldardyń, sondaı-aq Qazaqstannyń jekelegen ǵalymdarynyń ókilderi arasynda úzdikterdi anyqtap, álemge áıgili halyqaralyq Web of Science Citation («Ǵylym úzdigi») syılyǵymen marapattaıdy. Joǵary bilim men ǵylymı zertteýlerdi damytýǵa qosqan úlesi úshin syılyq jylyna bir ret beriledi, laýreattar sany álem boıynsha 500-den aspaıdy. Web of Science platformasy 1961 jyldan beri jumys isteıdi, platformanyń negizgi ózegi Web of Science Core Collection málimetter bazasy bolyp tabylady.
Clarivate Analytics kompanııasy Qazaqstan Respýblıkasynda 2011 jyldan beri jumys istep keledi. Qazirgi ýaqytta Clarivate Analytics kompanııasyna tıesili Web of Science kóne halyqaralyq ǵylymı-metrıkalyq júıesiniń zertteý nátıjeleri boıynsha kórnekti qazaqstandyq ǵalymdar men ǵylymı uıymdar ózderine laıyqty marapattarǵa ıe boldy.
2020 jyly Sátbaev Ýnıversıteti joǵary bilim men ǵylymı zertteýlerdiń damýyna qosqan úlesi úshin «Web of Science Core Collection-diń Qazaqstan Respýblıkasynyń tehnıkalyq ýnıversıtetteri arasynda Q1 jáne Q2 kvartıldi jýrnaldarda sońǵy 3 jyldaǵy basylymdar sany boıynsha kóshbasshy» nomınasııasy boıynsha táýelsiz «Ǵylym úzdigi – Web of Science Award» syılyǵyn qatarynan úshinshi ret jeńip aldy.
Sátbaev Ýnıversıtetiniń Rektory Iskander Beısembetov Clarivate Analytics kompanııasyna ýnıversıtet qyzmetin joǵary baǵalaǵany úshin zor alǵys bildirip, kompanııanyń ǵylymı ólshemderdi júıeleý jónindegi jumysynyń mańyzdylyǵyn, munyń nátıjesi osy marapattaý rásimi arqyly, jas ǵalymdardyń jumystary arqyly da ǵylym men elimizdiń damýyna tutastaı áser etetinin atap ótti.
Atalmysh is-sharaǵa Qazaqstan Respýblıkasy Bilim jáne ǵylym mınıstrliginiń basshylyǵy, Qazaqstannyń ǵylym, bilim berý, saıası jáne ekonomıkalyq salasynyń ókilderi qatysty. Olardyń arasynda Qazaqstan Respýblıkasy Ulttyq ǵylym akademııasynyń prezıdenti Murat Jurynov, TMD elderinen kelgen bedeldi sheteldik sarapshylardyń ókilderi, sondaı-aq Clarivate Analytics kompanııasynyń Reseıdegi basqarýshy dırektory Oleg Ýtkın bar.