Aqtóbede qaıyrymdy jandardyń arqasynda anasynan erte aıyrylǵan Úsenovter otbasy baspanaly boldy, dep habarlaıdy Egemen.kz.
Oblys ákimi Ońdasyn Orazalın 4 balanyń asyraýshysy jalǵyzbasty Amangeldi Zaıdýllaevqa 3 bólmeli páter kiltin tapsyryp, balalardyń baspanaly bolýyna at salysqan azamattarǵa alǵys bildirdi.
«Qazaq halqynda “Qaıyrymdylyq jasasań, qaıyryn óziń kóresiń degen qanatty sóz bar. Qaıyrymdylyq jasaý, jabyrqaǵannyń janynan tabylý, sharasyzǵa kómek qolyn sozý – halqymyzdyń qanyna bitken asyl qasıetteriniń biri. Búgingi shara, bizdiń bolashaǵymyz – balalar úshin jasalynyp jatqan ıgi is. Atalǵan másele memleket basshysynyń tikeleı baqylaýynda. Bizdiń mindetimiz - balanyń júzinen kúlki, júreginen qýanysh ketpeıtin ómir syılaý. "Hareket" qaıyrymdylyq qory, «Nektar» qurylys kompanııasy, barlyq kómek qolyn sozǵan qaırymdy azamattardyń arqasynda bir otbasy baspanaly boldy»,-dep atap ótti Ońdasyn Orazalın.
Kópbalaly otbasy buǵan deıin Amangeldi Zaıdýllaevtyń aǵasynyń menshigindegi shaǵyn úıde turyp kelgen. Qıyn jaǵdaıda qalǵan búldirshinderdiń máselesin sheshý maqsatynda óńir basshysy jetekshi qurylys kompanııalarmen kelissóz júrgizdi.
Nátıjesinde «Nektar» qurylys kompanııasynyń basshysy Shamıl Kaspranov jańasha úlgide salynǵan, aýmaǵy 93 sharshy metr bolatyn úsh bólmeli páterdi jeńildetilgen baǵamen usyndy. "Nektar“ turǵyn úı kesheninde ornalasqan jańa páterdiń ishine qajetti múlik satyp alyp berýge óńirdegi iri kásiporyndar da at salysty. «Aıs» JShS quryltaıshysy Marat Itegýlov, «Kásipkerlerdiń quqyǵyn qorǵaý qaýymdastyǵy» ZTB tóraǵasy Talǵat Hamıtov, "Qazaqstannyń saýda jáne qyzmet kórsetý salasy kásiporyndary naryqtarynyń Qaýymdastyǵy" zańdy tulǵalar birlestiginiń Aqtóbe fılıalynyń dırektory Dmıtrıı Dovmatenko, etnodızaıner, «Altyn Orda» avtorlyq úıiniń negizin qalaýshy Yrza Tursynzada, «Mektepke deıingi uıymdardyń Qazaqstandyq assosıasııasy» Aqtóbe fılıaly tóraıymy N.Kaıýdına jáne Aqtóbe qalasyndaǵy barlyq jekemenshik balabaqshalardyń quryltaıshylary, Aqtóbe oblysy boıynsha “Áıelder qaýymdastyǵynyń” jetekshisi Kúlshat Masalımova, QHA janyndaǵy analar keńesi tóraıymy Jumabıke Shamshadınova, mektep muǵalimderi turmysqa qajetti buıymdarmen qamtamasyz etilýine qarjylaı kómek kórsetti.
Úsenovter otbasyna buǵan deıinde memleket tarapynan túrli aksııalar aıasynda qoldaýlar kórsetilip keldi.