«Shańyraq» jeńimpazdary anyqtaldy

BAQ ókilderin 1 jeltoqsan – Qazaqstan Respýblıkasynyń Tuńǵysh Prezıdenti kúni merekesi­men quttyqtaǵan QHA Tóraǵa­sy­nyń orynbasary Janseıit Túı­me­baev memleket saıasa­tyn aqparattyq turǵydan qol­daýǵa, qoǵamdyq kelisim men jalpy­ult­tyq birlikti nyǵaıtýǵa, Qazaqstan halqy Assambleıasynyń qyzmetin nasıhattaýǵa úles qosyp júrgen jýrnalısterge alǵysyn aıtty.

– Tuńǵysh Prezıdentimiz Nur­sul­tan Nazarbaevtyń kóshbas­shy­lyǵymen elimiz álemniń saıası kartasynan laıyqty oryn alyp, bıik halyqaralyq bedelge ıe boldy. Táýelsizdiktiń 30 jyly ishinde júzege asqan barlyq reform men mańyzdy baǵdarlamalar, elimizdiń qol jetken tabystary jýrnalıster nazarynan tys qalǵan emes. Qazaqstan halqy Assambleıasy jyl saıyn memleket saıasatyn aqparattyq turǵy­dan qoldaýǵa, qoǵamdyq keli­sim men jalpyulttyq birlikti ny­ǵaı­týǵa belsendi úles qosyp júr­gen jýrnalısterdi qoldaý maq­satynda «Shańyraq» respýblı­kalyq baıqaýyn ótkizýdi dástúrge aınaldyrǵan, – dedi.

Quttyqtaý sóz barysynda Janseıit Qanseıituly jýrnalıs­ter­diń qoǵam ómirindegi mańyzy men ále­ýetine de keńinen toq­taldy.

– Osy oraıda otandyq jýrnalıstıka qoǵamdyq kelisimdi damytý, arandatýshy aqparattarǵa qarsy ımmýnıtetti qalyptastyrý jáne qoǵam birligin saqtaý taqy­ryptaryn jıi kóterýi tıis. Mem­lekettik tildiń mártebesin kóterý men memleket saıasatyn halyqqa túsin­dirý máselesinde de qolyna qalam ustaǵan aǵaıynnyń atqa­ra­tyn róli aıryqsha. Biz ár ýaqytta bar­lyq BAQ ókilderimen tyǵyz qa­rym-qatynasta jumys isteýge kúsh salyp kelemiz. Osy retti paı­da­lana otyryp, sizderdiń tarap­taryńyzdan kórsetilip jatqan aqparattyq qoldaý úshin alǵys bildiremin, – dedi J.Túımebaev.

Baıqaý qorytyndysy boıyn­sha Gran-prı «Qazaqparat» ha­lyq­aralyq aqparat agenttigine tabys­taldy. Bul arnaıy marapattyń júlde qory – 350 myń teńge. 1-oryn «Abaı» tele­a­rna­syn­daǵy «Sarasóz» baǵdar­lamasy­n­yń júrgizýshisi Elena Ábdi­ha­lyqovaǵa, «Almaty» telearnasy dırektorynyń orynbasary Ralıda Muqanovaǵa jáne «Qazaq úni» gazetiniń bas redaktory Qazybek Isaǵa berildi. Al «Qazaq gazetteri» saıtynyń redaktory Berik Beı­senuly, «Kazah­­stanskaıa pravda» gazetiniń Al­ma­ty qalasyndaǵy tilshisi Aı­gúl Turysbekova jáne «Kazakh-TV» arnasynyń tilshisi Jeńis Ermuqanovtar 2-orynǵa ıe boldy. 3-orynǵa «Ana tili» respýblıkalyq gazetiniń bas redaktory Janarbek Áshimjan, «Egemen Qazaqstan» gazetiniń tilshisi Svetlana Qojaqulova jáne «Habar-24» arnasy jańa­lyqtar bóliminiń tilshisi Qorǵan­bek Kópeı laıyq dep tanyldy. Sony­men qatar 1-oryn ıegerlerine – 300, 2-oryn ıegerlerine – 200, 3-oryn ıe­ger­lerine 150 myń teńge kóle­minde aqshalaı syılyq tabys etildi.

Sondaı-aq birqatar aqyn, jýr­­­nalıst, qoǵam qaıratkerleri «Qazaq­stan halqy Assambleıasyna- 25 jyl» medalimen jáne «Meıirim» tósbelgisimen marapattaldy.

Is-sharaǵa etnomádenı birles­tik ókilderi, Assambleıa músheleri jáne respýblıkalyq BAQ bas redaktorlary qatysty.

ALMATY