Senator Aqylbek Kúrishbaev veterınarııa júıesiniń jaı-kúıi nasharlaǵanyn aıtty. Úkimet basshysyna joldaǵan saýalynda depýtat munyń sebebi kezindegi birtutas veterınarııa júıesiniń bólinýi jáne qadaǵalaý fýnksııasynyń álsireýi dep túsindirdi, dep habarlaıdy Egemen.kz.
Aqylbek Kúrishbaev «Tıimsiz reformanyń sońy nege alyp kelgenin bizdiń jaǵdaıymyzǵa beıimdelmegen maldy jappaı ımporttap, onymen birge buryn bizde bolmaǵan kóptegen ekzotıkalyq juqpaly aýrýlardy taratýǵa sep bolǵan «Etti mal sharýashylyǵynyń eksporttyq áleýetin arttyrý» jobasynyń mysalynan kórýge bolady. Osy ýaqytqa deıin qoǵamda ımporttalǵan maldyń qalaı beıimdelgeni týraly, olardyń qanshasy aýrý bolyp shyqqany, qanshasynyń joıylǵany, qandaı aýrý túrlerin ákelgeni jáne qandaı aýqymda taralǵany jóninde aqparattar berilgen joq», - dedi.
Senat depýtatynyń aıtýy boıynsha asa qaýipti aýrýlardyń taralý faktilerin jasyrý jappaı etek alyp, kúrdeli máselege aınaldy, al bul epızootııalyq jaǵdaıdy naqty baǵalamaýdan jáne veterınarııalyq is-sharalardy durys josparlamaýdan týyndaǵan keleńsiz jaǵdaılardyń basty sebebi boldy.
«Jýyrdaǵy joǵary patogendi qus tumaýynyń órshýi veterınarııa salasynyń qaýqarsyzdyǵyn aıqyn kórsetti, onyń nátıjesinde qus sharýashylyǵy ónerkásibiniń birqatar kásiporyndary jyldar boıy ósirgen qus basynan aıyryldy, oǵan qosa qazirgi ekonomıkalyq daǵdarys jaǵdaıynda respýblıkalyq bıýdjetten 3,7 mlrd. teńge mólsherinde ótemaqy tóleýge májbúr bolyp otyrmyz», - dedi senator.
Senat depýtaty veterınarııa júıesiniń eldegi jemqorlyq jaılaǵan salalardyń birine aınalǵanyna alańdaýshylyq bildirdi. Munyń sebebi – jalaqynyń mardymsyz deńgeıi (mal dárigeriniń ortasha aılyq jalaqysy 80-100 myń teńge sheginde), zııandy eńbek jaǵdaılary úshin ústemeaqynyń bolmaýy, materıaldyq-tehnıkalyq bazanyń artta qalýy. Al aýyl sharýashylyǵy janýarlaryn ıdentıfıkasııalaý jáne esepke alý júıesinde, olarǵa qatysty biryńǵaı aqparattar derekqoryn qalyptastyrýda sıfrlyq tehnologııalardyń tıisti deńgeıde engizilmeýi – mal dárigerlerine sýbsıdııalardy zańsyz alý maqsatynda sharýashylyq sýbektileriniń janýarlary týraly aqparatty túzetýge jol berip otyr.
«Sybaılas jemqorlyq veterınarlyq preparattardy memlekettik satyp alý júıesin de tereń jaılap ketti, bul – salanyń sapasyz vaksınalar men dıagnostıkýmdarmen jabdyqtalýyna sebep boldy. Veterınarlyq qyzmettiń negizgi túrlerinde memlekettik monopolııanyń basym bolýy jáne jergilikti jerlerde kadrlardyń tapshylyǵy veterınarııa salasyna jeke kapıtaldyń kelýin is júzinde toqtatyp tastady», - dedi Aqylbek Kúrishbaev.
Senator veterınarııalyq ınspektorlardyń jalaqysyn kóbeıtýmen qatar, eńbektiń zııandy jaǵdaılary úshin, olardyń asa qaýipti aýrýlardy juqtyrý qateriniń bolýyn eskere otyryp, ústemeaqy tóleýdi kózdeý qajet ekenin aıtty. Aqylbek Kúrishbaev veterınarııa jáne janýarlardy esepke alý júıesine qazirgi zamanǵy sıfrlyq tehnologııalardy engizýdi jedeldetý, joǵary oqý oryndarynda veterınarııa mamandaryn daıarlaý júıesin oqý prosesin ǵylymı-zertteý qyzmetimen ıntegrasııalaý, veterınarııalyq zerthanalar júıesin ortalyqsyzdandyrý jáne referenttik-baqylaý fýnksııalaryn kúsheıtý jolymen reformalaý mańyzdy ekenine toqtaldy. Sonymen qatar, depýtat elimizde óndiriletin jáne memlekettik tapsyrys boıynsha satyp alynatyn veterınarııalyq preparattardyń sapasyn baqylaýdyń táýelsiz júıesin qurý qajettigine nazar aýdartty.