Dúısenbide 9 aıǵa sozylǵan fýtboldan Qazaqstan Premer-lıgasynyń kezekti maýsymy óz máresine jetti. 29-márte uıymdastyrylǵan el birinshiligin 12 komanda bastaǵanymen, eki týrdan keıin Pavlodardyń «Ertis» klýby qarjylyq qıyndyqqa baılanysty chempıonattan shyǵyp qaldy. Sóıtip maýsymnyń sońyna deıin 11 klýb jankúıerlerge tartysty oıyn syılap, «Qazaqstan chempıony» degen ataqqa jáne keler jylǵy Eýrokýbok básekelerine qatysýǵa múmkindik beretin joldamaǵa talasty.
Bıylǵy chempıonat pandemııaǵa baılanysty erekshe jaǵdaıda ótkenmen, jankúıerler esinde biraz saqtalatyny anyq. Naýryzda start berilgen ishki birinshilik eki ret bastalyp, eki ret keıinge shegerildi. Sondaı-aq osy jylǵy maýsym eń uzaq oınalǵan jáne tuńǵysh ret bir aımaqta ótken chempıonat retinde tarıhta qaldy. Buǵan deıingi eń kesh chempıonat 1999 jyly aıaqtalǵan bolatyn. Sol birinshiliktiń sońǵy týry 27 qarashada oınalǵan-dy. Al 2008 jylǵy birinshilik 20 qarashada máresine jetken. Sonymen qatar qalyptasqan jaǵdaıǵa baılanysty Qazaqstan kásipqoı fýtbol lıgasy jankúıerlerdiń stadıonǵa kirýine ruqsat bergen joq.
Osyndaı qıyn jaǵdaıda ótken birinshilikte fýtbol mamandary elordanyń «Astana» komandasy jetinshi chempıondyǵyn toılap, Almatynyń «Qaıraty» men byltyrǵy maýsymnan keıin quramyn birqatar myqty fýtbolshymen tolyqtyrǵan Qostanaıdyń «Tobyly» kúmis júldege talasady dep boljaǵan bolatyn. Sondaı-aq úzdik úshtiktiń qatarynan «Ordabasy» klýby da úmitti sanalǵan. Biraq chempıonat sońynda komandalar mamandar boljamynyń kúl-talqanyn shyǵardy. Maýsymdy óte sátti bastaǵan «Qaırat» el chempıonatyndaǵy eń basty qarsylastary – «Astanany» eki oıynda da qapy qaldyryp, elorda komandasynan chempıondyqty tartyp aldy. Jalpy «Qaırattyń» bul chempıondyǵy mamandardyń boljamymen sáıkes kelmese de, asa tańǵaldyra qoıǵan joq. О́ıtkeni almatylyqtar bıyl chempıonǵa laıyq óner kórsetti dep aıtýǵa tolyq negiz bar. Ekinshi týrda «Shahterden» 1:0 esebimen jeńilgenin eseptemeseńiz, chempıondyq ataqqa qol jetkizgenge deıin birde-bir ret qarsylastaryna ese jibergen joq. Tek sońǵy eki týrda ǵana upaı ala almady. Onyń ózinde bas bapker Alekseı Shpılevskıı jasyl alańǵa qosalqy quram men Akademııa tárbıelenýshilerin shyǵardy.
Bir qyzyǵy, byltyrǵy chempıonattyń sońǵy týrynda A.Shpılevskıı baspasóz máslıhatynda kelesi jyly jankúıerlerdiń úmitin aqtap, chempıon atanamyz dep ýáde berip, bıyl sol ýádesiniń údesinen shyqty.
Al maýsymnyń basy men orta tusynda bir jeńip, bir jeńilip ala-qula oıǵan «Tobyl» sońǵy alty týrdyń beseýinde táýir oıyn kórsetip, araǵa 12 jyl salyp kúmis júldege qol jetkizdi. Qostanaılyqtar eń keıingi kúmis júldesin 2008 jylǵy maýsymda jeńip alǵan bolatyn. Sońǵy týrlarda jeńiske jetken «Tobyl» kelesi jyly da Eýrokýbok oıyndarynda baq synaıtyn boldy.
Túıe boıyna senip jyldan qur qalypty degendeı, el birinshiliginiń alty dúrkin chempıondary «Astana» óz ataqtaryna senip, altyn júldeden de, kúmis júldeden qur qaldy. Shymkenttiń «Ordabasy» klýby sońǵy týrlarda sátsizdikke ushyramaǵanda, «Astanany» úshinshi orynnan da yǵystyryp jiberýi múmkin edi. Áıteýir, áýpirimdep júrip qola júlde men Eýrokýbok joldamasyn qorjynyna saldy. Jalpy bıyl «Astana» úshin óte sátsiz maýsym boldy. Maýsymdaǵy súreńsiz oıynyn aıtpaǵannyń ózinde, bir maýsymda úsh bapker aýystyryp úlgerdi.
Bıýdjeti jaǵynan «Astanamen» shamalas bolǵan «Ordabasy» klýby úshin de bul maýsym sátsiz ótti. Byltyr ǵana qola júldeni ıelengen shymkenttikter bıyl sol jetistigin qaıtalaý bylaı tursyn, sońǵy Eýrokýbok joldamasyn beretin tórtinshi orynnan da tys qalyp, chempıonatty besinshi orynmen qorytyndylady. 2019 jylǵy birinshilikte shymkenttikterdi órge súıregen Joao Paýlo bıyl da komandasyn alǵa qaraı jetelegenimen, bir óziniń shamasy jetpedi. Byltyrǵy Premer-lıgada 31 matchta 15 gol soqqan Paýlo bıyl 22 oıynda 12 gol soǵyp, chempıonattyń úzdik surmergeni atandy.
2013 jyly Eýropa fýtbolyn dúr silkindirip, Eýropa lıgasynyń toptyq kezeńinde óner kórsetken Qaraǵandynyń «Shahteri» keıingi jyldary súreńsiz oıyn kórsetip kelgen-di. Árige barmaı-aq keıingi eki jyldaǵy kórsetkishin aıtar bolsaq, «kenshiler» komandasy 2018 jylǵy maýsymdy 8-orynmen aıaqtasa, 2019 jyly 9-oryndy qanaǵat tutqan bolatyn. Byltyrǵy maýsymnyń sońynda «Shahter» fýtbol klýbynyń basshylyǵynda ózgeris bolyp, komandanyń atqarýshy dırektory retinde Erlan Orazaev taǵaıyndaldy. Bir jyldyń ishinde jańa komanda jasaqtap shyǵarǵan Orazaev á degennen-aq «kenshilerdi» Eýrokýbokqa shyǵardy. Bıyl pandemııaǵa baılanysty fýtboldan Qazaqstan kýbogy ótkizilmegen soń, Eýrokýboktyń sońǵy joldamasy el birinshiliginde tórtinshi oryn alǵan komandaǵa berildi.
Sondaı-aq el birinshiliginde eń nashar oıyn kórsetip, 11-oryn ıelengen «Oqjetpes» kelesi jyldan bastap Birinshi lıgada óner kórsetetin boldy. Al byltyr tómengi lıgaǵa túsip qalǵan «Aqtóbe» men «Atyraý» bıyl Premer-lıgaǵa qaıta oraldy.
Bıylǵy birinshiliktiń birqatar statıstıkalyq málimetterin nazarlaryńyzǵa usynsaq: bıylǵy maýsym Qazaqstan chempıonatynyń tarıhyndaǵy eń az gol soǵylǵan chempıonattyń biri boldy. 11 komandanyń shabýylshylary 22 týrda 274 gol soqty.
Chempıon atanǵan «Qaırat» komandasy qarsylastarynyń qaqpasyna 48 gol soǵyp, eń úzdik nátıjeni tirkedi. Al «Tobyl» komandasy óz qaqpasyna eń az gol ótkizgen (16) komanda atandy.
Bıylǵy maýsymda Joao Paýlo («Ordabasy») 2000 jyldan keıin Qazaqstan chempıonatynda úzdik shabýylshy atanǵan ekinshi brazılııalyq fýtbolshy atandy. Buǵan deıin 2000 jyly «Ertistiń» shabýylshysy Nılton Mendes 21 gol soqqan bolatyn. Al qazaqstandyq fýtbolshylar arasynan Abat Aıymbetov («Qaırat») 10 gol soǵyp, ekinshi jyl qatarynan úzdikter qatarynan kórindi.