Qurlyqtyq hokkeı lıgasynda (QHL) baq synaıtyn Nur-Sultannyń «Barysy» elordadaǵy «Barys Arenada» «Sochı» klýbyn qabyldap, kezekti jeńisine qol jetkizdi.
Turaqty birinshiliktiń keıingi bes oıynynda qatarynan jeńilgen «Barys» jankúıerlerdiń kóńiline selkeý túsirgen edi. Súreńsiz oıyndardan keıin jankúıerler aldynda óz aıybyn jýyp-shaıýǵa tyrysqan jerlesterimiz, mine, ekinshi matchta da jeńiske jetip, kórermenderin qýantýda. Alǵash Máskeýdiń «Spartak» klýbyn 2:1 esebimen tize búktirse, keıingi básekede Sochıden kelgen qarsylastarynyń qaqpasyna jaýapsyz eki shaıba soqty.
Jerlesterimiz kezdesý taǵdyryn birinshi kezeńde-aq sheship tastady deýge bolady. Matchtyń 12-mınýtynda Vıktor Svedbergten pas alǵan Roman Starchenko esep ashsa, araǵa bir mınýt salyp «Barystyń» shvesııalyq shabýylshysy Iаkob Lılıa tablodaǵy kórsetkishti 2:0-ge jetkizdi. Qalǵan eki kezeńde qarsylastar bir-biriniń qaqpa kiltin taba almady. Osylaısha, «Barys» qatarynan ekinshi oıynda jeńiske jetti. Endi jerlesterimiz kelesi kezdesýin búgin Iаroslavldiń «Lokomotıv» klýbymen ótkizedi.