Elordalyq kópbalaly analar QR Táýelsizdiginiń 30 jyldyǵyna arnalǵan «30 ıgi is» aksııasyna qosyldy. Bilim All oqý ortalyǵy kóp balaly otbasylardan shyqqan balalardy tegin oqytady, dep habarlaıdy Egemen.kz.
«Qazirgi tańda biz Bilim All IT oqý ortalyǵyn ashtyq. Qalada uıymdastyrylyp jatqan «30 ıgi is» sharasyna qatysýdamyz. Biz kópbalaly otbasylar balalaryn tegin oqytamyz. Demeýshiler taýyp, qarjylaı kómek kórsetip, azyq-túlik sebetterin taratamyz. О́tkizilip jatqan atalmysh sharaǵa belsene atsalysyp jatyrmyz», – «Strong mothers NS» qorynyń quryltaıshysy Uljan Myrzageldıeva.
Ortalyqta az qamtylǵan, kóp balaly jáne tolyq emes otbasylar men qoldaýǵa muqtaj otbasylardan shyqqan oqýshylar túrli kýrstar boıynsha tegin qosymshalarǵa qatysa alady. Bilim All ortalyǵynda uzartylǵan kún toptary, orys, qazaq, aǵylshyn jáne arab tilderi, matematıka kýrstary, shahmat úıirmesi, shyǵarmashylyq sheberhana, gıtara jáne dombyra sabaqtary uıymdastyrylǵan.
«Bizde kópbalaly otbasylardyń balalaryna aǵylshyn tili sabaǵy eki aýysymda, tegin ótkiziledi. Sabaq naqty baǵdarlama negizinde beriledi. Balalardy til bilý deńgeıine, jas toptaryna baılanysty bólemiz. Bastaýysh synypta oqıtyn balalar úshin oqý qıyn, sondyqtan basymdylyq soǵan beriledi. Al orta býynǵa grammatıka, sózder úıretýge kómektesemiz», – deıdi aǵylshyn páni muǵalimi Gúlnáz Maqatova.
Eske sala keteıik, Qazaqstan Táýelsizdiginiń 30 jyldyǵy qarsańynda elordada «30 ıgi is» uranymen áleýmettik jáne qaıyrymdylyq is-sharalary ótýde. Bul estafetadaǵy eń basty maqsat – qala men onyń turǵyndary úshin ıgi is jasaý.
Qala turǵyndary estafetaǵa qosylyp, aksııa aıasynda óz akkaýnttarynda #Meıirimdibolýádet, #Dobrotaobrazjıznı #Modnobytdobrym heshtegimen aqparat nemese beıne jarııalaı alady.