Sońǵy derekterge súıensek, Aqtóbe oblysyndaǵy volonterlik toptardyń sany 90-ǵa jetti. Uıymdardyń árqaısysynyń baǵyty bir-birine uqsamaıdy. Olardy biriktiretin faktor — aqysyz negizde jaqsylyq jasaýǵa qushtarlyq.
75 volonterdiń medısınalyq kómegi
M.Ospanov atyndaǵy Batys Qazaqstan memlekettik medısına ýnıversıtetinde «Medık-volonterler» klýby bar. Atalǵan top 2011 jyldan beri jumys isteıdi. О́ziniń aty aıtyp turǵandaı, densaýlyǵy syr bergenderge medısınalyq kómek kórsetedi, aýrýdyń aldyn alýǵa baǵyttalǵan sharalar uıymdastyrady.
– Biz negizinen medısınalyq járdemge kúsh salamyz. Mektepter men kolledjderde juqpaly, onkologııalyq aýrýlarǵa qarsy túsindirý jumystaryn júrgizip, qalaı saqtaný kerektigin aıtamyz. Sondaı-aq kópshilik jerlerde adam aǵzasyndaǵy qant mólsherin anyqtap, qan qysymyn ólsheımiz. Aptasyna eki ret oblystyq ortalyq aýrýhanaǵa baryp, arnaıy kezekshilikpen sondaǵy medbıkelerdiń «qolyn uzartamyz». Mysaly, qańtar-naýryz aılarynda medısınalyq mekemelerge baryp turdyq, – deıdi «Medık-volonterler» klýbynyń jetekshisi Baqtııar Baımahan.
Onyń sózinshe, elimizde tótenshe jaǵdaı jarııalanǵanda da volonterlerdiń árqaısysy qolda bar qarajatyn qosyp, materıaldyq jaǵynan qıyndyqqa tap bolǵan 4-5 otbasyǵa azyq-túlik taratqan. Bul topta qazirgi tańda 75 stýdent bar.
Alǵashqy medısınalyq kómekti qalaı jasaý kerek, kúızelisti qaıtkende jeńýge bolady degen kúndelikti ómirde qajetti keńester beretin klýb endi naýqas balalarǵa aqysyz massaj jasaýdy josparlap otyr. О́ıtkeni týabitti dertke dýshar bolǵan sábılerdiń sany, ókinishke qaraı, elimizde az emes...
Qaıyrymdylyq aksııalaryn ótkizedi
Salamatty ómir saltyn ári qaıyrymdylyq jasaýdy nasıhattaıtyn «Ansar volunteer» tobyn aqtóbelikterdiń birazy biledi. Olar oblystaǵy erikti jastar arasynda shaǵyn fýtboldan týrnır ótkizip, komandalardyń saıysqa qatysý jarnasynan túsken aqshany ıgi iske jumsaıdy. Máselen, sondaı oıynnyń birinen jınalǵan 200 myń teńgeni volonterler 4 otbasyǵa bólip berdi. Al tótenshe jaǵdaı kezinde áleýmettik jeliler arqyly, demeýshilerdiń arqasynda 260 myń teńge jınap, 29 muqtaj otbasyǵa azyq-túlik taratty. Qasıetti Ramazan aıynda 100 myń teńge jınalyp, kóp balaly, áleýmettik jaǵdaıy tómen 15 anaǵa azyq-túlik sebeti berildi. Oǵan qosa turǵyndardyń qaýipsizdigi úshin volonterler 200-den astam medısınalyq betperde tigip, jurtshylyqqa úlestirgen. «Ansar volunteer» tobynyń jetekshisi Meırambek Shekernaev ıgi ister týraly oı-pikirin tómendegishe sabaqtady:
– Qazirgi tańda quramymyzda 40-qa jýyq volonter bar. Jastardyń tek qaıyrymdylyqpen aınalyspaı, rýhanı damýy úshin Saqtaǵan Báıishev atyndaǵy oblystyq kitaphanamen birlesip, «Kovorkıng» ortalyǵynda ár jeksenbi saıyn túrli sharalardyń ótýine muryndyq bolyp júrmiz. Atap aıtsaq, «Kınotime» sharasynda tárbıelik mazmuny tereń otandyq fılmderdi nasıhattasaq, «Oqyrman oıynda» zamandastarymyzdyń kitap oqýǵa degen yntasyn oıatyp, ózara pikir alysamyz. «Keıipkermen suhbat» aıdarynda jastardy ómirde ózindik ornyn tapqan bilikti mamandarmen kezdestirsek, ýaqytty tıimdi paıdalanyp, adamdarmen durys qarym-qatynas qurýy úshin psıhologııalyq semınar-trenıngter ótkizemiz. Bunyń bári qatarlastarymyzdyń arasynda zor qyzyǵýshylyq týǵyzdy.
Byltyr Aqtóbe qalasynyń 150 jyldyǵyna «150 jyldyqqa –150 túp aǵash» aksııasyn bastap, 25 jas kóshet otyrǵyzdyq. Estafetany basqa klýbtarǵa joldadyq, – deıdi.
Aıta keteıik, atalǵan klýb ótken jyldyń 1 naýryzynda «Ańsar» aqparattyq taldaý ortalyǵynyń janynan qurylǵan.
P.S. «Kelisip pishken ton kelte bolmas». Birigip, bir úıdiń balalaryndaı tatý bolǵanda ǵana kez kelgen sharýanyń shyraıy shyǵady. Biz áńgimege tartqan jas volonterlerdiń de aıtary sol.
Aıbek TASQALIEV,
jýrnalıst
AQTО́BE