Elordadaǵy Prezıdent janyndaǵy Ortalyq kommýnıkasııalar qyzmetinde Mádenıet jáne sport mınıstri Aqtoty Raıymqulovanyń qatysýymen Memlekettik týdy paıdalanýǵa qatysty baspasóz máslıhaty ótti.
Jıynda mınıstr Memlekettik týdy zańsyz jasap shyǵarý, jeke jáne zańdy tulǵalardyń qoldanýy, ulttyq standart týraly aıtty. «Qazaqstan Respýblıkasynyń Memlekettik týy kólemine qaramastan, ulttyq standartqa sáıkes kelýi tıis. Jeke jáne zańdy tulǵalardyń ulttyq standart talaptaryn buzyp, Memlekettik týdy paıdalanýyna jol berilmeıdi. Ulttyq standartqa saı kelmeý degenimiz – memlekettik týdaǵy nysandy, mólsherdi jáne tehnıkalyq talaptardy buzý. Memlekettik tý ulttyq standartqa sáıkes kelmegen jaǵdaıda, Úkimet aıqyndaǵan tártippen aýystyrylyp, joıylýy kerek», dep atap ótti mınıstr.
Ákimshilik quqyq buzýshylyq týraly kodekske sáıkes, ulttyq standart talaptaryna saı kelmeıtin Memlekettik týdy zańsyz daıyndaǵandarǵa ákimshilik aıyppul salynady. Mınıstrdiń aıtýynsha, Úkimettiń 2020 jylǵy 27 qarashadaǵy №801 qaýlysyna sáıkes Memlekettik týyn, Eltańbasyn jáne olardyń beınelerin, Memlekettik gımnniń mátinin paıdalaný qaǵıdalaryna ózgerister engizildi. Endigi kezekte bul ózgerister arqyly azamattarymyz úshin Memlekettik týdy paıdalaný aıasy zańnamalyq turǵyda keńeıtilip otyr. Eń aldymen Memlekettik týdy jeke jáne zańdy tulǵalar ǵımarattarda, onyń ishinde balkondarda jáne saltanatty is-sharalar ótkiziletin oryndarda patrıottyq sezimderin, qazaqstandyq biregeıligin bildirý úshin, el azamattarynyń jetistikterin qoldaý maqsatynda paıdalana alady.
«Búgingi tańda Konstıtýsııalyq zańǵa sáıkes, Memlekettik tý beınesi ózge de materıaldyq nysandarda salynýy múmkin. Alaıda bir ret paıdalanylatyn zattar bul materıaldyq nysandardyń qataryna jatpaıdy. Sonymen birge Memlekettik tý Qazaqstan Respýblıkasynyń №988-2007 ulttyq standartyn saqtaı otyryp jasalǵan jáne ony lısenzııasy bar ýákiletti uıymdar ǵana jasaı alady», dep jaýap berdi mınıstr jýrnalısterdiń konfet syrtyndaǵy Memlekettik týdyń sýreti jaıyndaǵy suraqqa.
Sonymen birge mınıstr Memlekettik týdy qoldanýǵa bolmaıtyn jaıttardy aıtyp berdi. Ashyp aıtar bolsaq, adamǵa nemese zatqa degen qurmet retinde tý tómen túsirilmeýi kerek, tý qandaı da bir zatqa, jerge nemese sýǵa tımeýi kerek. Sondaı-aq týdyń saby kóldeneńinen kóterilmeıdi. Týǵa jazý jazýǵa nemese sýret salýǵa bolmaıdy, ol kıim nemese tósek, shymyldyq retinde paıdalanylmaıdy. Qazaqstan Respýblıkasy atynan óner kórsetetin sportshylardyń kıiminde Memlekettik týdyń beınesin paıdalaný aıryqsha jaǵdaı sanalady.
«2020 jylǵy 27 qazanda Memleket basshysy Qasym-Jomart Toqaevtyń Memlekettik týdy paıdalanýǵa qatysty memlekettik rámizderdi paıdalaný qaǵıdalaryn qaıta qaraý tapsyrmasy berildi. Atalǵan tapsyrmaǵa sáıkes, Memlekettik týdy, Eltańbany jáne olardyń beınelerin, Memlekettik gımnniń mátinin paıdalaný qaǵıdalaryna ózgerister engizildi. Endigi kezekte azamattarymyz úshin Memlekettik týdy paıdalaný aıasy zańnamalyq turǵyda keńeıtilip otyr», dep atap ótti mınıstr.
«Sonymen qatar jeke tulǵalarǵa osy qaǵıdalarǵa engizilgen ózgeristerge sáıkes, Memlekettik týdy bir qabatty nemese kóp qabatty ǵımarattarda ekstererli nusqada ornalastyrý kezinde ǵımarattyń sáýlet erekshelikterine qaramastan paıdalaný múmkindigi berildi. Budan bylaı jeke tulǵalar ǵımarattarda ornalastyrylatyn Memlekettik týdy qarańǵy ýaqytta jaryq quraldaryn qoldanbaı-aq paıdalana alady. Jalpy alǵanda, joǵaryda kórsetilgen ózgertýler Memlekettik týdyń qoldanylý aıasyn edáýir keńeıtedi», dedi Aqtoty Raıymqulova.