Búgin Jambyl oblysynyń ákimdiginde Parlament Májilisiniń jáne máslıhattar depýtattaryn saılaý máseleleri boıynsha oblystyq shtabtyń otyrysy ótti, dep habarlaıdy Egemen.kz
Kezdesýde oblys ákimi Berdibek Saparbaev aldaǵy máslıhattar saılaýy alǵash ret partııalyq tizim boıynsha ótkeli otyrǵandyǵyn, saıası partııalar eldiń saıası júıesindegi óz pozısııalaryn nyǵaıtý úshin teń múmkindikterge ıe bolatynyn atap ótti.
Oblystyq aýmaqtyq saılaý komıssııasynyń tóraǵasy Serǵalı Aıdapkelov barlyq deńgeıdegi máslıhattar úshin 51 partııalyq tizim anyqtalyp, oǵan 523 kandıdat engenin aıtty. Úmitkerlerdiń jalpy sanynyń 43,8 paıyzyn áıel azamattar men 29 jasqa deıingi jastar quraıdy eken. Komıssııa tóraǵasy jekelegen saılaý rásimderine, atap aıqanda, úmitkerlerdi usyný jáne tirkeý, saılaýaldy úgit-nasıhat jumystarynyń merzimine toqtaldy.
Atalǵan jıynda Berdibek Saparbaev óńirde saılaýǵa daıyndyq tıisti deńgeıde ótip jatpaǵanyn aıtyp, aýdan ákimderiniń jumysyn synǵa aldy. Ákimniń aıtýynsha, saılaýshylardyń tizimi tolyǵymen qalyptaspaǵan. Sonymen qatar, Taraz qalasynda jáne birqatar aýdandarda ýchaskelerdiń bári birdeı ınternetpen, beınebaqylaý kameralarymen, pandýstarmen qamtylmaǵan.
"Eger oblys ortalyǵyndaǵy saılaý ýchaskeleri 100 paıyz daıyn bolmasa, onda aýdandar týraly ne aıtýǵa bolady? Úsh jaǵdaı boıynsha da Qordaı aýdany artta qalyp otyr. Shý jáne T.Rysqulov aýdandaryndaǵy jaǵdaı da kóńil kónshitpeıdi. Barynsha qysqa ýaqytta osy olqylyqtardyń barlyǵyn joıý qajet jáne múmkindigi shekteýli jambyldyqtardyń saılaý quqyǵyn qamtamasyz etýge erekshe nazar aýdarý kerek", dedi Berdibek Saparbaev.
Al oblys boıynsha sanıtarlyq-epıdemıologııalyq baqylaý departamenti basshysynyń mindetin atqarýshy Neılıa Mýlıkova qazir saılaý ýchaskeleriniń sanıtarlyq talaptarǵa sáıkestigi tekserilip jatqandyǵyn aıtty.
Bul rette oblys ákimi karantındik shekteýler azamattardyń el Konstıtýsııasynda kepildendirilgen daýys berý quqyǵyn júzege asyrýyna kedergi bolmaýy tıis ekenin, degenmen, saılaýshylar, komıssııa músheleri men baqylaýshylar sanıtarlyq normalardy qatań saqtaýy kerektigin, ol úshin aýdandarda tıisti jaǵdaılar jasalýy kerek ekenin atap ótti. Jıynda oblystyq polısııa departamentiniń bastyǵy, general-maıor Janat Súleımenov saılaý kezinde 1000-nan astam polıseı zańdylyq pen tártiptiń saqtalýyn qamtamasyz etetinin jetkizdi. Shtab músheleri ár saılaý ýchaskesinde medısınalyq pýnktter ashý jáne em alyp jatqan naýqastardyń daýys berýine qatysty máselelerdi talqylady.