Almaty oblysynyń polıseıleri birqatar urlyq derekterine qatysy bar qylmystyq top ókilderin quryqtady, – dep habarlaıdy Polisia.kz.
Aǵymdaǵy jyldyń qazan jáne qarasha aılarynda jeke úılerden ózgeniń múlkin qoldy qylýdyń 12 deregi tirkelgen bolatyn. Onyń alty deregi Taldyqorǵan qalasynda, beseýi Sarqan jáne bireýi Kóksý aýdandarynda jasaldy. Atalǵan derekter boıynsha QR Qylmystyq kodeksiniń 188-baby 2, 3-bólikteri boıynsha sotqa deıingi tergeý amaldary júrgizildi.
– Serııaly urlyq tizbesine qatysy bar kúdiktilerdi anyqtaý úshin bilikti polıseıler qatarynan izdeý toby quryldy. Kásibı iz kesýshiler urlyqtardy jasaýǵa qatysy bar qylmystyq toptyń jymysqy áreketin áshkereledi. Top Taldyqorǵan qalasynyń 22-29 jastaǵy turǵyndary, bes adamnan quralǵany anyqtaldy. Bultartpas aıǵaqtardan keıin kúdiktiler óz qylmystaryn moıyndady. Olardyń osyǵan uqsas ashylmaǵan ózge de qylmystarǵa qatysy bary tekserilýde. Qylmystyq is boıynsha basqa derekter QR QPK-niń 201-babyna sáıkes jarııa etýge jatpaıdy, – dedi Taldyqorǵan QPB bastyǵy Asqar Nursapa.
Polısııa taratqan aqparatqa sáıkes, tergeý barysynda qylmystyq top ókilderinen olar qoldy qylǵan turmystyq tehnıka, qymbat kıimder, baǵaly zattar men ózge de urlanǵan múlikter tárkilengen. Urlanǵan zattardyń bir bóligi tergeý áreketteri kezinde satyp alýshylardan alyndy.
Tergeý barysynda ustalǵandardyń úsheýiniń buǵan deıin de bireýdiń múlkin urlaǵany jáne alaıaqtyq jasaǵany úshin qylmystyq jaýapkershilikke tartylǵany belgili boldy. qazirgi ýaqytta tórt kúdikti ýaqytsha ustaý ızolıatoryna qamaqqa alyndy, bireýi mekenjaıyn ózgertpeý týraly mindettememen bosatyldy.