SQO-da sońǵy 4 kúnde 7 ınternet-alaıaqtyq tirkeldi. Onyń ishinde 39 jastaǵy Taıynsha aýdanynyń turǵynyna asa kóp shyǵyn keltirilgen, dep habarlaıdy Egemen.kz
Áıel tegin habarlandyrýlar saıty arqyly jıhaz satqan. Onymen qaskóı baılanysqa shyǵyp, satyp alýǵa daıyn ekenin, al shoty Reseı bankinde dep tólem jasaý úshin JSN men karta nómirin ataýyn suraǵan. Alýshy tabylǵanǵa qýanǵan áıel "júk tıeýshiler" keledi degenge mekenjaıyn da aıtqan.
Telefonmen sóılesý barysynda jábirlenýshi sandar jazylǵan kody bar sms-habarlama alǵan. Ar jaqtaǵy áıel túbirtek toltyrý úshin osy sandardy ataýyn suraǵan. Alaıaqpen sóıleskennen keıin jábirlenýshi bankke qońyraý shalǵan. Sóıtse... Banktegi depozıtinen úsh kezeńmen 2 mıllıon 600 myń teńgeden astam barlyq jıǵan qarajaty alynǵany aıtylǵan. Derekterge qol jetkizgennen keıin, qylmysker ınternet-bankıngtiń bar múmkindikterin paıdalanypty. SMS-habarlamadaǵy kodtar oǵan jábirlenýshiniń shotyndaǵy operasııany rastaýyna múmkindik bergen. Atalǵan fakti Qylmystyq kodekstiń "Alaıaqtyq" baby boıynsha Sotqa deıingi tergep-tekserýlerdiń biryńǵaı tizilimine engizildi. Jedel-izdestirý is-sharalary júrgizilip jatyr.
Al Petropavl qalasynyń 54 jastaǵy áıel turǵyny banktiń qaýipsizdik qyzmetinen dep qońyraý soqqan sumdardyń arbaýyna túsip qalǵan. Alaıaq onyń shotynan bireýler barlyq aqshasyn aýdaryp jatyr dep sastyrǵan. Qarajatty saqtap qalý úshin ony basqa shotqa aýystyrý qajet dep soqqan. Áıel kartasynyń nómiri men sms-habarlama kodty aıtqan, sodan keıin shyn máninde onyń depozıtinen 700 myńnan astam teńgesi joq bolyp shyqqan.