Túrkistan oblysy Saryaǵash aýdanynda aýyl sharýashylyǵy maqsatyndaǵy jerlerdi paıdalanbaı jatqan tulǵalardy anyqtaý úshin monıtorıng jumystary júrgizilgen. Nátıjesinde, 157 azamattyń 8689,66 gektar jerdi paıdalanbaǵandyǵy anyqtalǵan, dep habarlaıdy Egemen.kz
Olarǵa túsindirý jumystary júrgizilip, 86 jer ıesi 6427,66 gektar jerin ıgerýdi bastady. Al 14 azamatqa tıesili 251,42 gektar jer memleketke qaıtarylǵan.
Qazirgi tańda qalǵan tulǵalardyń ıgerilmeı jatqan jerleri boıynsha tıisti jumystar júrgizilýde. Aýdan ákimi Muhıt Otarshıevtiń málimetinshe, aýdanda bıyldyń 11 aıynda jer telimderin jalǵa berýden túsetin túsim 11 mln 741 myń teńge bolyp josparlansa, qazir bul kórsetkish 10 mln 574,8 myń teńgege (90,1%) oryndalǵan.
Jyl basynan beri aýyl sharýashylyǵy maqsatyndaǵy jerlerge 4 ret konkýrs ótkizilgen. Nátıjesinde, 62 jeke jáne zańdy tulǵalarǵa 5544,3 gektar aýyl sharýashylyǵy maqsatyndaǵy jer telimi jalǵa berilip, qaıta aınalymǵa engizildi.