Atyraýda meıirimdilik pen qaıyrymdylyqty serik etip, muqtaj jandarǵa qol ushyn sozǵan úzdik volonterler marapattaldy, dep habarlaıdy Egemen.kz.
«Birlik – bizdiń qasıetti týymyz» dep Elbasy aıtqandaı, birlik pen tatýlyq qoǵamymyzǵa kúsh berip otyr. Sonyń nátıjesinde koronavırýs pandemııasyn birlese eńserip kelemiz. Teginde qıyndyqqa rýhanı kúsh-jigermen tótep berý – yntymaq pen birliktiń aıqyn belgisi. Prezıdent Qasym-Jomart Toqaev óz sózinde «...Eriktilerdiń boıyndaǵy qaırat, jiger ár azamatty yntalandyrýy tıis. Bul – eń aldymen, órkenıetti eldiń jáne jaýapkershiliktiń belgisi» dep atap kórsetti. Volonterlerge zor senim artyp, ádaıym abyroıly, tabysty bolýyna tilekshimin» dedi oblys ákimi Mahambet Dosmuhambetov.
Volonter jylynyń qorytyndysymen «Jomart júrek» nomınasııasy bes volonterge berildi. Altyngúl Shakımova korporatıvtik eriktiligi, Arman Haırýllın qorshaǵan ortany saqtaýǵa qosqan úlesi, Gúlnaz Qosmurzıeva áleýmettik máselelerdi sheshýge atsalysqany úshin úzdik dep tanyldy.
Jergilikti kásipker Marat О́mirzaqovqa «Jyl mesenaty» berilse, NCOC kompanııasy «Jyldyń úzdik uıymy» atandy.
«Byltyrǵy naýryzda eriktiler korpýsynyń quramynda qaıyrymdylyq maqsatta qarjy jınaýǵa qatystym. Bir aıda 7 mıllıon teńge jınadyq. Bizge iri kompanııalarmen birge, qarapaıym turǵyndar da kómek berdi. Sonyń nátıjesinde 2 myńǵa jýyq otbasy azyq-túlik sebetin aldy. Pandemııa kezinde dári-dármekterdi Reseıdiń Astrahan qalasynan aldyryp, muqtaj adamdarǵa tarattyq. Bizge 90-ǵa jýyq avtovolonter zor qoldaý kórsetti» deıdi Gúlnaz Qosmurzıeva.
Bir top volonterge «Halyq alǵysy» medali tabys etildi.