Túrkistan oblysy PD tergeýshileri brakonerlerdiń qylmystyq tobyna qatysty 20 tomdyq isti sotqa joldady, – dep habarlaıdy Polisia.kz.
Polıseı Altynaı Jolymbekova qym-qýyt oqıǵaǵa órilgen Shardara sý qoımasyndaǵy brakonerlerdiń qylmystyq tobyna qatysty istiń ashylýy jaıynda tómendegideı málimet berdi:
– О́zderińizge belgili 2020 jyldyń maýsym aıynda eldi dúrliktirgen qylmys oryn alǵan edi. Polısııaǵa Shardara sý qoımasy aýmaǵynda belgisiz adamdar zańsyz balyq aýlaýmen aınalysatyny týraly aryz túsken. Atalǵan derek QR QK 335-baby (Balyq resýrstaryn, basqa da sý janýarlaryn nemese ósimdikterin zańsyz óndirý) boıynsha SDTBT-de tirkeldi. Brakonerlerdi ustaý úshin Túrkistan oblysynyń PD arnaıy jedel-tergeý tobyn qurdy. Eki aıdyń ishinde derlik jedel ýákilder dáleldemeler jınady, qylmystyq kásipke qatysqan barlyq qatysýshylardyń baılanysyn zerttedi. Jedel-izdestirý is-sharalary barysynda polısııa qyzmetkerleri 10 adamnan turatyn qylmystyq topty ustady. Olardyń barlyǵy Túrkistan oblysy men Shymkent qalasynyń turǵyndary. Arasynda bir erli-zaıyptylar bar. Kúdiktilerden zattaı dálel retinde balyq aýlaý quraldary, 13 qaıyq, 389 patron, bir jarym tonnadan astam jańa aýlanǵan balyq jáne 425 kg ystalǵan balyq tárkilenip alyndy. Keltirilgen materıaldyq shyǵyn segiz mıllıon teńgeden asty. Osy istiń aqıqatyna kóz jetkizý úshin men, ózime tapsyrylǵan jaýapty qylmystyq iske júıeli taldaý jasap, jedel tergeý isin bastadym. Bizge dáleldemeler bazasyn muqııat jınap, birneshe saraptama men tergeý sharalaryn júrgizýge týra keldi. Negizinde kúdiktilerdiń kópshiligi ózderi istegen qylmystaryn moınyna almaıdy. Jasaǵan qylmysty moıyndatý úshin naqty aıǵaqtar men dálelder taýyp, Qylmystyq is júrgizý kodeksiniń talaptarymen tergep, árbir isti tereń ári tııanaqty zerttegende ǵana, istiń sońǵy núktesi qoıylady. Osyndaı tyndyrymdy tirliktiń arqasynda brakonerlikke kúdiktilerdiń kinásin tolyǵymen dáleldedik. Qylmystyq istiń sotqa deıingi tergeý materıaldary 20 tomnan asty. Brakonerlerdiń qylmystyq top ekeni anyqtaldy. Onda barlyq rólder naqty bólingen: bireýleri balyqty zańsyz aýlaǵan, sodan keıin ony satyp alýshylarǵa satqan, kelesileri alynǵan balyq ónimderin Shymkent qalasynyń bazarlarynda saýdaǵa shyǵarǵan. Bul qylmystyq is ashylý úshin úsh aı kóleminde tergeldi. Ustalǵan 10 kúdiktiniń beseýi kepilmen bosatylǵan, qalǵany “qolhatta”. Qazirgi ýaqytta sotqa deıingi tergeý jumystary aıaqtaldy jáne qylmystyq is aıyptaý aktisimen zańdy sheshim qabyldaý úshin sotqa jiberildi. Búginde sotta qaralýda. О́z basym maǵan júktelgen árbir iske jaýapkershilikpen qarap, nátıjeli aıaqtaýǵa barymdy salamyn, – dep atap ótti aǵa tergeýshi A. Jolymbekova.