Qyraýly qystyń qaterin eskere bermeý opyq jegizýi ábden múmkin. Aıdalada bir táýlik boıy kólik ishinde qalǵan balyqshyny polısııa qyzmetkerleri qutqaryp aldy, dep habarlaıdy Egemen.kz.
Oqıǵa bylaı órbigen. Áýesqoı balyqshy Qorǵaljyn aýdanyndaǵy Sabyndy aýylynyń janyndaǵy Nura ózeninen balyq aýlamaqshy bolǵan. Kún aıazdy bolǵanymen, áýesqoılyq sezim jeńgen. Kóligi ózenniń qabaǵynda qasat qarǵa batyp qalypty. Ári-beri árekettengenimen, qar qursaýynan shyǵa almaǵan ol tek bir táýlikten keıin ǵana polısııa bólimshesimen habarlasqan. Ile polısııa kapıtandary Ádilbek Boranbaev pen Beısenbaı Hamıtjanov oqıǵa ornyna jetken. Tez arada balyqshyny taýyp alyp, qar qursaýynan bosatqan.
Tas jolǵa deıin jetkizipti. Balyqshy ábden jaýraǵanymen, din aman. Bir táýlik qar qursaýǵa keptelgen ol der kezinde jetken polısııa qyzmetkerlerine alǵysyn jaýdyrdy.