Qazirgi ýaqytta álemniń damyǵan elderi áskerlerge robottandyrylǵan júıelerdi engizýge kóp kóńil bóledi. Áskerı robottar Qazaqstannyń Qarýly Kúshterinde de keńinen qoldanylady.
2015 jyldan bastap, QR Qarýly Kúshterin jaraqtandyrýǵa jerústi, teńiz jáne áýe maqsatyndaǵy robototehnıkalyq quraldar kelip túsýde.
Álemdik trendterdi zerdeleý jáne jańa tehnologııalardy ilgeriletý úshin 2019 jyly Bas shtabta robototehnıkalyq júıelerdi damytý jáne olardy qoldaný basqarmasy quryldy. Basqarma mamandary jańa tehnologııalardy engizý jáne qoldaný boıynsha josparly jumys júrgizýde. Olar oqý oryndarymen jáne qorǵanys-ónerkásiptik keshenimen ózara tyǵyz is-qımyl jasaıdy, ǵylymı kásiporyndarmen birlesip robottardyń tájirıbelik úlgilerin ázirleýge qatysady.
Búginde el áskeriniń qarý-jaraǵynda robottardyń jerdegi jáne teńizdegi eki túri bar. Eye Drive telebasqarylatyn shaǵyn robottyń salmaǵy úsh keli. Ol nashar qıylysqan jerde, qalalyq ınfraqurylym men úı-jaılarda nysandar men aýmaqtardy beıne jáne aýdıobarlaýdy júrgizýge múmkindik beredi. Robotty ǵımaratqa jiberý arqyly, ol sol jerden aqparatty 50 metrge deıin qashyqtyqtaǵy operatordyń planshetine jetkizedi. Ashyq jerde shaǵyn robottyń radıýsy 300 metrden asady.
Jeńil klasty mobıldi robottandyrylǵan tEODor kesheni mınasyzdandyrýdan qaýipti jumystardy júrgizý kezinde paıdalanylady. Ol jarylǵysh qurylǵyny anyqtap, operatordyń basqarýymen ony basqa jerge kóshirý úshin arnaıy konteınerge salady. tEODor júz kılogramǵa deıin salmaqty kóterip, ony 200 metrden eki shaqyrymǵa deıin jyljytýǵa qabiletti.
Mına-traldy korabl bazasynda ornalasqan k-Ster-I sýasty robot-ınspektory teńiz túbiniń landshaftyn zertteıdi, jarylys qaýpi bar zattardy tabady jáne olardan alǵan derekterdi operatorǵa beredi.
Mınaǵa qarsy qashyqtyqtan basqarylatyn k-Ster-s sý asty apparattary 300 metrge deıingi tereńdiktegi sý asty mınalaryn joıýǵa arnalǵan. Olar tasymaldaýshy kemeden bir shaqyrym qashyqtyqta jumys isteı alady.
Jerdegi jáne sý astyndaǵy tapsyrmalardy oryndaı otyryp, eń qıyn jerlerde, áskerı robottar jeke quram arasyndaǵy shyǵyndardyń aldyn alýǵa jáne bólimshelerdiń jaýyngerlik qabiletin arttyrýǵa múmkindik beredi.