Atyraý oblysynyń ákimi Mahambet Dosmuhambetov 2020-2025 jyldary óńirde jeti mıllıonnan astam kóshet egý josparlanyp otyrǵanyn aıtty, dep habarlaıdy Egemen.kz.
Atyraý oblysynda memlekettiń ıeligindegi ormannyń qory 52 400 gektardy quraıdy. Onyń ishinde ormandy alqap – 15 100 gektar. Orman alqaptary Jaıyq pen Qıǵash ózenderiniń jaǵasynda ǵana ósiriledi.
«Ekologııa, geologııa jáne tabıǵı resýrstar mınıstrligimen birlese jasaqtalǵan ormandardy tolyqtyrý, orman ósirý kólemin ulǵaıtýǵa qatysty qadamdyq jospar jasaqtaldy. Soǵan sáıkes oblysta 2020-2025 jyldary aralyǵynda 2 800 gektar orman alqabynda 7 mıllıonnan astam kóshetin egý josparlandy», - deıdi oblys ákimi Mahambet Dosmuhambetov.
Ákimniń pikirinshe, Jaıyq ózeniniń boıyndaǵy toǵaılardy qalpyna keltirý, jaıylma alqaptardy jasyl jelekpen kómkerý Atyraý óńiriniń ekologııalyq ahýalyn jaqsartýǵa oń áserin tıgizedi.
«Qazir mejelengen josparǵa sáıkes, árbir orman sharýashylyǵy mekemesi kóshet egiletin ýchaskeler men aǵash túrleri anyqtalyp, naqty jospar jasaldy. Mundaı aýqymdy jumysty atqarý orman sharýashylyǵy mekemelerin materıaldyq-tehnıkalyq jaraqtandyrý deńgeıine baılanysty bolyp otyr. Sońǵy úsh jylda jergilikti bıýdjetten 427 mln teńgege 3 orman mekemesine mashına-traktor parki, órt sóndirý stansııalary, jumys kestesi bar keshender, 2 órt baqylaý munarasy salynyp, paıdalanýǵa berildi», - deıdi ákim.
Sondaı-aq orman mekemelerin jaraqtandyrýǵa jergilikti bıýdjetten 206 mln teńge bólindi. Al 2020-2025 jyldarǵa arnalǵan qadamdyq jospardy iske asyrýǵa qajetti qarjy kólemi 769 mln teńgeni quraıdy.