Respýblıkamyzdyń batystaǵy qaqpasy – Oral qalasynda óndiristiń ózge salalaryna qaraǵanda mashına jasaý jáne qorǵanystyq-ónerkásiptik keshen syndy strategııalyq sıpattaǵy salalar jaqsy damyǵan. Iаǵnı, elimizdiń atalǵan keshen aıasyndaǵy basty baǵytyn aıqyndaıtyn faktorlar Aqjaıyq aımaǵynda qalyptasqan desek qatelese qoımaspyz.
«Qazaqstan ınjınırıng» UK AQ quramyna kiretin óńirdegi qorǵanys kásiporyndary sońǵy ýaqytta arnaıy óndiris túrlerin konveıerge qoıý úshin jańasha bir betburys jasaı bastaǵany baıqalady.
Solardyń biri Batys Qazaqstan mashına jasaý kompanııasy bolyp otyr. Ras, atalǵan kásiporyn keıingi kezde buıyǵy kúı keship, tomaǵa tuıyq qalǵandaı kórinetin. Áıtse de bul tek syrtqy qubylys bolyp shyqqanyna súısinbesek renjimeıtin shyǵarmyz. Shyntýaıtyna kelgende, munda buǵan deıingi moraldyq turǵydan eskirgen qural-jabdyqtar yǵystyrylyp, jańa zamanaýı tehnologııalar engizilip jatyr eken. Sonyń negizinde keńestik kezeńdegi «Metallıst» qarý-jaraq zaýytynda bıyl jańa jobalar qolǵa alyna bastapty.
Sonyń biri – memleketimizdegi qurlyq áskerleriniń negizgi qarýy bolyp tabylatyn zeńbirek deýge ábden bolady. Osylaısha elimizde tuńǵysh ret kúshi joıqyn zeńbirek shyǵarý óndirisi bastaldy deýge tolyq negiz bar. Sóıtip aldymyzdaǵy 2021 jyldan bastap otandyq kásiporynda memlekettik-qorǵanystyq tapsyrysqa sáıkes atalǵan qarý túri jasalmaq. Bul úshin zaýyttaǵy buǵan deıingi synaq ortalyǵy qaıta jaraqtandyrylǵan. Sondaı-aq qarý-jaraq óndirisine qajetti polıgon máselesi de óz sheshimin taýyp úlgergen. Batys Qazaqstan mashına jasaý kompanııasyna qurlyqta qoldanylatyn qarýlarǵa qosa teńiz qarýlaryn qurastyrýǵa da lısenzııa berilgen.
ORAL