Premer-Mınıstrdiń orynbasary Eraly Toǵjanov Almatyǵa sapary aıasynda medısına, shyǵarmashylyq qaýym ókilderimen kezdesip, týrıstik maqsattaǵy birqatar nysandy aralady. Memleket basshysynyń ishki ekologııalyq týrızm mádenıetin belsendi damytý jónindegi tapsyrmalarynyń údesimen tanysty.
Vıse-premer bastaǵan delegasııa «Medeý» bazalyq stansasy men «Shymbulaq» TShK eń joǵary núktesindegi vızıt-ortalyqtardy, Tenir Eco Hotel glempıngtik qurylys alańyndaǵy jumystardy kórdi.
Almaty qalalyq týrızm basqarmasynyń basshysy Sabına Amankeldi bıyl ınvestorlardyń qarajatyna joǵaryda atalǵan 2 vızıt-ortalyq salynyp, Tenir Eco Hotel glempıngtik aımaǵynyń qurylysy aıaqtalǵanyn málimdedi. Úsh jobaǵa tartylatyn jeke ınvestısııalardyń jalpy somasy shamamen 1 mlrd teńgeni quraıdy. Búginde «Shymbulaq» taý shańǵysy kýrortynyń eń bıik 3200 metrlik núktesinde iske qosylǵan vızıt-ortalyqta kýrort týraly aqparattar, kádesyılar men «Shymbulaq» leıbli bar fırmalyq kıimderdi, jabdyqtardy jalǵa alýǵa, taý shańǵysy men snoýbordta syrǵanaýdy oqytatyn nusqaýshynyń qyzmetin jáne taýǵa jaıaý joryq, qarda júrý, paraplanmen ushý qyzmetterin satyp alýǵa bolady.
Jeltoqsan aıynda «Medeý» bazalyq stansasynda «Densaýlyq soqpaǵyna» shaqyratyn jáne týrısterge ekotýrızm boıynsha aqysyz bilim beretin vızıt-ortalyq iske qosyldy. Bıyl jyl sońynda paıdalanýǵa beriletin Tenir Eco Hotel glempıngtik aımaǵynan Ile Alataýy shyńdarynyń ǵajaıyp kórinisi ashylady. Joba ınvestory Vladımır Sarybekov eko-úıler tolyǵymen qazaqstandyq zaýyttarda jınalǵanyn, resırkýlıasııalyq tazartý júıesimen jabdyqtalǵanyn, bul ekologııany saqtaý úshin mańyzdy ekenin atap ótti. Keshenniń ózi halyqaralyq standarttarǵa sáıkes jáne 30 tósektik oryndyq 10 eko úıden turady.
Qazirgi tańda kýrortta Qazaqstandaǵy eń iri taý shańǵysy mektebi – «Shymbulaq» taý shańǵysy jáne snoýbord mektebi jumys isteıdi. Jyl saıyn mektepte taý shańǵysy men snoýbordtan 10 myńnan astam sabaq ótedi, al oqýshylar sany 15 myń adamnan asady.
Týrıstik nysandardy aralap shyqqan Premer-Mınıstrdiń orynbasary qonaqúıler, taý shańǵysy kesheni, meıramhana, dámhana, hostelder jáne ártúrli baǵyttaǵy demalys ortalyqtary bar kýrorttyń barlyq maýsymda da qyzmet etetinin eskere otyryp, emdik-saýyqtyrý týrızmin damytýǵa da erekshe nazar aýdarylýy qajettigin jetkizdi. Ásirese pandemııa jaǵdaıynda qala turǵyndary men qonaqtary densaýlyqtaryn nyǵaıtýy úshin taýǵa barýǵa barlyq jaǵdaı jasalýy qajet.
Almatyda týrıstik ınfraqurylymdy damytý sheńberinde 3 jylda 1 myń shaqyrymǵa jýyq taýdaǵy jaıaý marshrýttar sıfrlanyp, jalpy uzyndyǵy 325 shaqyrym bolatyn 25 taý marshrýty abattandyrylǵan. Bıyl Kishi jáne Úlken Almaty shatqaldarynda jalpy uzyndyǵy 171 shaqyrymdyq 11 taý marshrýty jónge keltirildi. Bul baǵyttarda aqparattyq taqtalar, stendter, baǵyttamalar, sákiler, otyrý oryndary ornalastyrylǵan. Osylaısha, qala turǵyndary men qonaqtary taýly jerlerde serýendegende joldan adaspaı demalysyn uıymdastyra alady. Sonymen qatar qalada týrısterge aqparat beretin 8 oryn jumys isteıdi
«Halyqaralyq tájirıbege sáıkes vızıt ortalyqtary – týrısterdi belgili bir jerdi tanystyratyn birinshi núkte. Munda kelýshiler alǵashqy sátten bastap ózderine ǵana emes, qorshaǵan ortaǵa da qamqorlyq jasaý keregin túsinedi. Dál osy tujyrymdamany basshylyqqa ala otyryp, biz Shymbulaq taýly kýrortynda da osyǵan uqsas tásil qoldanýdy usyndyq», dedi Kazakh Tourism UK basqarma tóraǵasynyń orynbasary Q.Sadýaqasov.
«Qazirgi zamanaýı ózgerister týrısterdi ekologııalyq baǵdarlanǵan demalys formatyna kóbirek tartyp jatyr. Eger mundaı oıyn-saýyqty ádettegi jaıly turý ádisimen úılestirý múmkin bolsa, onda saıahatshylardyń kópshiligine sapar shegetin baǵyttardy tańdaýǵa glammıngter sheshýshi ról atqarady. Ekologııalyq tehnologııalardy qoldanýdy eskere otyryp, mundaı jobalar barlyǵynyń kóńilinen shyǵýy kerek», deıdi ınvestor V.Sarybekov.
Jumys toby sonymen qatar 2021-2022 jyldary Almaty oblysynyń týrıstik qyzyǵýshylyǵy bar jerlerde júzege asyrylatyn S.N.E.G qonaqúı jelisiniń jobasymen tanysty. Investor qurylystyń birinshi kezeńi úsh túrli jerde bastalatynyn habarlady.
Sonymen qatar E.Toǵjanov shańǵy jáne snoýbord mektebiniń balalarymen jáne nusqaýshylarymen áńgimelesti. Byltyr taý kýrorty kesheninde qalalyq ákimdiktiń qoldaýymen 1200-den astam bala aqysyz jattyqqan. Osy arada uzaq otbasylyq demalystarǵa qyzyǵýshylyq artyp kele jatqanyn atap ótken jón. Álemdik naryqtaǵy basqa da taý shańǵysy kýrorttarymen, qonaqúılermen jáne týroperatorlarmen júıeli jumys júrgizilýde.
«Qazir ózge eldermen shekaralar jabyq bolǵandyqtan, ishki týrızmdi damytatyn kez keldi. Týrızm naryǵyndaǵy azamattar birigýge kiristi, bul týrıstik ónim qoljetimdi bola bastady degendi bildiredi», dedi «Shymbulaq» demalys ornynyń bas dırektory Rınat Ábdirahmanov.
ALMATY