Balyǵy týlaǵan, ań-qusy shýlaǵan Marqakól óńirinde úlken úki kózge túsken. Ony qaraǵaıǵa qonaqtap otyrǵan jerinde qoryq qyzmetkeri uıaly telefonynyń kamerasyna túsirip alypty.
Qyzyl kitapqa engen bul qustyń túrleri negizinen ormandy, taýly aımaqtarda mekendeıdi. Uıasyn jyrtqyshtar jete almaıtyndaı etip, jyra, jartastarǵa jasyryp salady. Jemtigin túnde aýlaıtyndyqtan da kózge kóp kórine bermeıdi. Al Marqakól qoryǵynyń qyzmetkeri Talǵat Aıtqazın kıeli qusty kezekti reıd kezinde orman ishinen baıqap qalǵan. Onyń aıtýynsha, ımek tumsyqtyń jaıǵandaǵy qanaty bir jarym metrden asyp ketken.
– Men kórgen qus – eń úlken úkilerdiń biri. Olar kóbinese qyzyl nemese aqshyl tústi bolady. Úkini shoshaıǵan qulaǵy men qyzǵylt kózine qarap-aq tanısyń, – deıdi qoryqshy T.Aıtqazın.
Qazaq halqy úkini kıeli dep esepteıdi. О́ıtkeni bul qustyń qanatynda quran sózderi jazylǵan dep túsinedi. Sol úshin de úlpildegen qanatyn besikke, dombyraǵa, bas kıimge, júıriktiń jalyna taǵyp jatady. Nanym-senimge nazar aýdarsaq, úki qanaty balany jyn-shaıtannan qorǵaıdy, eresekterdi oljaǵa keneltedi-mys.
Keıbir ǵalymdardyń pikirinshe, japalaq tuqymdas bul qus Qazaqstannyń Qyzyl kitabyna engendikten, qanatyn qara bazarda satyp turǵandardy da baqylaýǵa alý kerek eken. Biraq ǵalamtordaǵy habarlandyrýlardy qarap otyrsańyz, qanatyn qoıyp, úkiniń ózin saýdalap jatqandar barshylyq. Baǵalary 40 myń, 70 myń dep kete beredi. Alaıda Qyzyl kitaptaǵy ań-qustar erekshe qorǵaýda bolýy tıis emes pe edi?!
Shyǵys Qazaqstan oblysy