Búgin oblys ákimi Gúlshara Ábdiqalyqovanyń tóraǵalyǵymen sý tapshylyǵy jaǵdaıynda egin sharýashylyǵyn ártaraptandyrý jóninde májilis ótti. Jıynǵa memlekettiń organ, ǵylymı-zertteý ınstıtýttarynyń ókilderi, sharýashylyq basshylary men onlaın rejımde «Ulttyq agrarlyq ǵylymı-bilim berý ortalyǵy» AQ basqarma tóraǵasynyń mindetin atqarýshy Aıbyn Tórehanov, qala jáne aýdan ákimderi qatysty, dep habarlaıdy Egemen.kz
Qyzylorda oblysynyń basty ereksheligi – bul ınjenerlik júıege keltirilgen egis alqaptary. Búgingi kúni oblysta 236 myń gektar sýarmaly jer bolsa, onyń 178 myńy ınjenerlik júıege keltirilgen. Jylda 180 myń gektardyń ústinde aýyl sharýashylyǵy daqyldary egiledi. Memlekettik qoldaýlardyń arqasynda oblystyń aýyl sharýashylyǵy óndirisiniń damýynda oń nátıjeler qalyptasty.
- Bıylǵy 10 aıda aýyl sharýashylyǵy ónimderiniń óndirisi 128,5 mlrd teńgege jetti. Esepti kezeńde aýyl sharýashylyǵy salasyna tartylǵan ınvestısııa 10,6 mlrd teńgeni qurap, ótken jyldyń osy kezeńimen salystyrǵanda kórsetkish 1,9 esege, tamaq ónimderine salynǵan ınvestısııa kólemi 1,2 mlrd tg qurap 1,6 esege ósti.
Degenmen, sońǵy jyldary aýa raıynyń ózgeristeri men sý tapshylyǵy oblysta egin sharýashylyǵyn ártaraptandyrýdy qajet etip otyr. Egis kólemin ártaraptandyrý baǵytynda sońǵy bes jylda mal azyqtyq daqyldar kólemi 4 myń gektarǵa, al, kúrishten basqa dándi daqyldar kólemi 7,5 myń gektarǵa kóbeıgenimen, ártaraptandyrý jumystary áli de baıaý júrýde. Sý tapshylyǵy jaǵdaıynda biz negizgi daqyl kúrish egistiginiń kólemin belgili bir deńgeıge deıin turaqtandyryp, onyń ónimdiligin arttyrýdy jáne sýdy únemdeýge múmkindik beretin basqa daqyldar kólemin ulǵaıtýdy qarastyrýymyz qajet, – dedi oblys ákimi Gúlshara Ábdiqalyqova.
Búgingi kúni jańbyrlatyp, tamshylatyp sýarý jáne akvageldi paıdalana otyryp aýyl sharýashylyǵy ónimderin óndirýge erekshe nazar aýdarylýda. Osy baǵytta Jańaqorǵan aýdanda «Orbis Agro» kompanııasy 3 myń gektarǵa tamshylatyp sýarý arqyly qyzanaq, Shıeli aýdanynda «Tyń О́ris» kompanııasy 10 myń gektarǵa jańbyrlatyp sýarý ádisimen jońyshqa, Qazaly aýdanynda «RZA-Agro» seriktestigi 87 gektarǵa jańbyrlatyp sýarý arqyly júgeri egýdi qolǵa alǵan.
Sonymen qatar, bıylǵy jyldan bastap tálimdi jerler ıgerilýde. Kelesi jyly atalǵan jumystardy atqarýǵa Jańaqorǵan aýdanynda akvageldi qoldaný arqyly 500 gektar maqsary daqyly men 200 gektar jazdyq bıdaı egiledi dep josparlanýda.
Májiliste sala ǵalymdary ártaraptandyrý kezinde sýarmaly sýdy únemdeýdiń jańa tehnologııalaryn engizý, sýarmaly jerleriniń degradasııasy jáne olardy tómendetý joldary, kúrish aýyspaly egisin ártaraptandyrý jáne kúrish alqaptary men egistiginiń jaǵdaıyna ǵaryshtyq monıtorıng júrgizý máselelerin sóz etti.
2021 jyly egiletin daqyldardyń egis kóleminiń syzbasy Qyzylorda qalasy men aýdan ákimdikterimen jáne tıisti mekemelerimen kelisilip, bólinetin sý kólemi lımıti sheginde jasalyndy. Syzbaǵa sáıkes, aýyl sharýashylyǵy daqyldaryn 187,3 myń gektarǵa ornalastyrý mejelense, onyń ishinde negizgi daqyl kúrishtiń kólemi 85,7 myń gektardy qurap otyr.
Jıyn sońynda aımaq basshysy sý tapshylyǵy jaǵdaıynda ártaraptandyrýdy júzege asyrý úshin eginshilik mádenıetine ǵylymnyń ozyq jetistikterin engizýdi jáne eginshilik salasyn paıdaly kásipke aınaldyrý qajet ekenin atap ótti.