Qostanaı aýdanyndaǵy Zarechnyı aýylynda qazaq tilinde tárbıe beretin jańa balabaqsha paıdalanýǵa berildi. "Ádemi" dep atalatyn bóbekjaı 2 jastan 5 jasqa deıingi 90 balǵyndy qabyldaı alady, dep habarlaıdy Egemen.kz
"Qostanaı aýdanynda jalpy sany 7 balabaqsha jumys isteıdi. Onyń ekeýi – jekemenshik. Búginde aýdanda 900-den astam bóbek balabaqshaǵa barady. Munyń syrtynda, myńnan artyq balany qamtıtyn 44 mektepke deıingi shaǵyn ortalyq jumys istep tur. Búgingi jańa balabaqshada 19 jumys orny ashyldy", dedi aýdan ákimi J.Táýkenov.
Aýyl balabaqshasynda balǵyndardyń jas ereksheligine qaraı úsh top jumys isteıdi. Mektepke deıingi tárbıe mekemesi jekemenshik bola tura, ata-analar tek balalardyń tamaǵyna ǵana aıyna 11-13 myń teńge tóleıdi. Qalǵanyn memleket qarjylandyrady. Bóbekjaıǵa balǵyndar aldaǵy aptadan bastap Indıgo saıty arqyly qabyldanady. Alaıda qazirdiń ózinde balalaryn jetektep kelip jatqan ata-analar bar. Mysaly, atalmysh balabaqshada tárbıeshi bolyp jumys atqaratyn Gúlsara Alshynbaeva óziniń 3 jasar qyzyn da osynda bermek.
Búginde Qostanaı oblysynda uzyn sany 579 balabaqsha men shaǵyn ortalyq jumys isteıdi. Balabaqshaǵa baryp júrgen 31 myńnan astam balanyń 7 myńnan astamy 76 jekemenshik bóbekjaılarda tárbıelenip jatyr.