Qurlyqtyq hokkeı lıgasynyń (QHL) kezekti týr oıynyn Nur-Sultannyń «Barysy» óz aıdynynda Nıjnıı Novgorodtyń «Torpedosymen» ótkizdi.
Syrttaǵy oıynǵa qaraǵanda, óz muz aıdynynda sátti óner kórsetetin elordalyq komanda «Barys Arenada» ótkizip júrgen keıingi oıyndarynyń bárin jeńispen túıindep, jankúıerlerin qýantyp júrgen bolatyn. О́kinishke qaraı, úı oıyndar serııasyndaǵy sońǵy kezdesýde «Torpedo» ujymynan jeńilip, tórt oıynǵa sozylǵan jeńisti serııany jalǵastyra almady.
Jerlesterimiz alǵashqy kezeńde óte súreńsiz oıyn kórsetti. Birinshi 20 mınýttyń orta tusyna kelgende qonaqtardyń shabýylshysy Sergeı Goncharýk mergendigimen kózge túsip, Henrık Karlssondy qapy qaldyrdy. Ekinshi kezeńdi de «Torpedo» oıynshylary sátti bastady. Alǵash Mıhaıl Varnakov «Torpedonyń» basymdyǵyn nyǵaıtsa, sál keıinirek Djastın Klýs tablodaǵy kórsetkishti 3:0-ge jetkizdi. Úsh gol ótkizip alǵannan keıin ǵana es jıǵan aıdyn ıeleri qarqyn alyp, úziliske deıin esep aıyrmasyn qysqartýǵa múmkindik aldy. Aınaldyrǵan segiz mınýttyń ishinde Fıl Varone qonaqtar qaqpasyna eki ret dál soqqy jasap, esepti 3:2-ge deıin qysqartty. Alaıda sońǵy kezeńde «Barystyń» jeńisti julyp alýǵa shamasy jetpedi.