QR Ekologııa, geologııa jáne tabıǵı resýrstar mınıstri Maǵzum Myrzaǵalıev Mańǵystaý oblysyna is-sapary barysynda «Caspian Riviera» JShS balyq sharýashylyǵynyń jumysymen tanysty.
2014 jyly qurylǵan sharýashylyq jylyna 100 tonna balyq óndiredi. Bekire sharýashylyǵynyń 2400 sharshy shaqyrym aýmaqta jasandy sý arnasy, Ortalyq Azııadaǵy eń úlken jekemenshik akvarıýmy, ýltradybystyq zertteý apparaty, ınkýbasııalyq seh, balyq saqtaıtyn tońazytqyshtary men sý sapasyn tekserý zerthanasy bar.«Bizdiń kompanııamyz 6 jyl boıy balyq ósirýdiń túrli ádisterin qoldanyp jumys istep kórdik. Qazirgi ýaqytta úlken bekire sharýashylyǵy zaýytyn salýdy josparlap jatyr. Zaýyt Aqtaý teńiz porty arnaıy ekonomıkalyq aımaǵynda bolady. Aımaqta akvamádenıet salasy bolmaǵandyqtan kelissózderge ýaqyt ketti», - dedi sharýashylyq dırektory Raýshan Hamıtova. Maǵzum Myrzaǵalıev óz kezeginde Ekologııa mınıstrligi balyq sharýashylyǵyndaǵy iri jobaǵa qoldaý kórsetýge daıyn ekenin jetkizdi. Eske salsaq, Memleket basshysy Qasym-Jomart Toqaev halyqqa joldaýynda balyq sharýashylyǵyna erekshe mán berý kerektigin aıtqan. 2019 jyly elimizdiń balyq jáne balyq ónimderi naryǵynyń jalpy kólemi 66 myń tonnany qurady. Qazaqstandaǵy sý resýrstary 600 myń tonnaǵa deıin balyq ósirip, eksportty 10 esege arttyrýǵa múmkindik beredi. Sol sebepti qazir Ekologııa mınıstrligi sharýalardy qoldaý maqsatynda birqatar Zańdarǵa ózgeris engizip, sýbsıdııa berý joldaryn qarastyryp jatyr.