Men on segiz jyldan beri zeınet demalysyndamyn, bul árıne az ýaqyt emes. On segiz jyl buryn dúnıege kelgen uldarymyz búgin er jetti, qyzdarymyz boı jetti. Búginde ózim yńqyl-syńqylmen seksenniń seńgirine shyǵyp, beıbit zamanda memleket qamqorymen kún keship jatyrmyn.
El ekonomıkasynyń tyǵyryqqa tirelgen shaǵyn bastan keshtim. Odan shyǵý úshin ótpeli kezeńde Úkimet halyq múddesine saı jedel sheshimder qabyldap, el turmysyn onyń suranysyna saı jaqsartýǵa tyrysty. Biraq ol sheshimderdi tez arada júzege asyrý ońaı bolǵan joq. Táýelsizdigimizdi baıandy etý jolynda qanshama izdeniske baryp, qanshama qıyndyqty bastan keshirýge týra kelgenin el tizginin ustap, osy máselelermen tikeleı aınalysqan jaýapty laýazymdaǵylar jaqsy biledi.
Táýelsizdigimizdiń alǵashqy jyldary burynǵy sosıalıstik júıege beıimdelgen kadrlar halyqtyń kúnkóris máselelerin tez arada sheshýge qaýqarsyz boldy. Alaıda Tuńǵysh Prezıdent az ýaqyt ishinde mańaıyna táýekelge bara alatyn, ózine ózi senimdi, yntaly mamandardy iriktep, el múddesine qyzmet etýge baǵyttaı aldy. Elbasy bastamasymen joǵarydan basqarylatyn josparly sharýashylyq júrgizý tásilderi tez arada joıylyp, taýar óndirýshi kásiporyndar memleket menshiginen alynyp, jekeniń menshigine berildi. Osylaısha, kapıtalıstik júıege negizdelgen táýelsiz memleket qurý úshin naryqtyq ekonomıka áreketterine barsań da barasyń, barmasań da barasyń degen úzildi-kesildi talap qoıyldy. Sol kezden bastap, menshikti memleket ıeliginen alý, jekeshelendirý jáne menshikke derbestik berý degen jańa termınder qoldanysqa endi.
Oǵan deıin odaqtyq josparlaý, ıaǵnı «Gosplan» degen organnyń halyqtyq sharýashylyq kesheni taratylyp, Máskeý endigi jerde odaqtas respýblıkalar ortalyqqa qol jaımaı, óz kúnderin ózderi kórsin deýge májbúr bolǵan edi. Osynyń nátıjesinde odaqtyq óndiris oryndary joıylyp, kúndelikti ómirge qajet taýarlar óndirisi toqtap, dúken sóreleri qańyrap bos qaldy. Osyndaı ekonomıkalyq daǵdarysta biz odaqpen qoshtasyp, táýelsiz Qazaq memleketiniń qabyrǵasyn qalaýdy bastadyq, aıtýǵa árıne ońaı, tájirıbelik turǵyda oǵan kedergiler az bolǵan joq. El ekonomıkasynyń tez arada tyǵyryqtan shyǵyp, órkendep damı bastaýynda Tuńǵysh Prezıdenttiń batyl áreketteri sheshýshi ról atqardy. Ol kisiniń kósh bastaýǵa laıyqty tulǵa ekenin ýaqyttyń ózi dáleldep berdi.
Táýelsizdikke betburys bastalǵan kezde Elbasy osy jaǵdaılardy halyqqa dáleldi túrde túsindirip: «Táýelsiz memleket qurý buryn-sońdy bizdiń tájirıbemizde bolǵan joq. Ol úshin endi qyrýar jumystar atqarý qajet. Sondyqtan alda áli talaı qıyndyqtar bolady. Qatelikter de bolýy múmkin», dep ashyq aıtty. Osylaısha, Memleket basshysy halyqty ótpeli kezeńniń nebir qıyndyqtaryna tóze bilýge shaqyrdy. Alǵashynda biz «bul keshegi keńes zamanyndaǵy jalań urandar sııaqty bolyp qalmas pa eken?» dep te oıladyq. Biraq kóp keshikpeı ol kezeńniń qıyndyqtaryn ár adam jan-tánimen sezdi, árkim burynǵydaı memleketke qol jaıýdan aryla bastady. Sodan keıin memleket menshigindegi kásiporyndar bankrotqa ushyrap, olardyń múlikteri jekeshelendirildi, boryshtary joıyldy. Menshik ıeleri ekonomıkalyq bostandyq alyp, suranysqa saı ónim shyǵaratyn shaǵyn kásiporyndar ashyp, ózderiniń pozısııalaryn kúsheıtti. Shaǵyn jáne orta kásipkerlikpen aınalysýǵa úkimet tarapynan kóptegen jeńildik jasaldy. Bul jumystardyń búginge deıin jalǵasyp jatqanyn kózimiz kórip otyr. Osy ıgi isterdiń basy-qasynda ózim de júrgendikten, Táýelsizdik merekesi qarsańynda kórgen-bilgenimdi aıtyp, ótken tarıhty eske alǵandy jón kórdim.
Barshamyzǵa Táýelsizdik kúni merekesi qutty bolsyn! Elde tynyshtyq, birlik bolsa, alynbaıtyn qamal, asý bermeıtin asqar joq, men oǵan kámil senemin! Táýelsiz Qazaqstanǵa táýeldi bolaıyq, aǵaıyn!
Myrzaǵalı QURMANOV,
zeınetker
Qostanaı oblysy,
Tobyl qalasy